Ichimlik suvi quvuri o`tkazish uchun Qarshi tumanining Cho`li ota hududidagi “Xoniyon”, “Dasht”, “Taraqqiyot” mahallalariga olib boruvchi yo`l yoqasida amalga oshirilgan qazuv ishlarining hadeganda yakuniga etmagani, aholining e`tirozlariga sabab bo`lib, bu haqda Darakchi tahririyatiga murojaat yo`llashdi. Mazkur murojaatni o`rganish, aholi va tegishli mutasaddilar bilan suhbatlashish maqsadida Dasht mahallasida bo`ldik.
- Yoz oylari edi. Mahallamizga olib keluvchi yo`l yoqasida qazish ishlari boshlandi, - deydi shu erlik fuqaro Gulnoz Boboqulova. – Bizga aytishlaricha, mahallamizga ichimlik suvi keltirilayotgan ekan. Suvni-ku kelgani yaxshi, albatta. Ammo suv kelguniga qadar o`tgan vaqtda qazilgan joylar ko`milmasa, ishlar surilaversa, tabiiyki, yog`inli kunlarda aholiga muammolar tug`ilishi mumkin. Qolaversa, mahallamiz ichki yo`llari ham abgor holda. Hududimiz katta, Qarshi shahriga yaqin. Shu sababli ko`chalarimiz doimo serqatnov. Yo`llarimiz uzoq yillardan buyon ta`mirlanmagan. Bu haqda mahalla mutasaddilariga bir necha bor murojaat qilganmiz. Taklifimizni tuman rahbariyatiga etkazshini so`raganmiz. Afsuski, biror samara yo`q. Yog`in-sochinli kunlarda birgalashib yo`lning juda yomon qismlariga qum-shag`al to`kib turamiz. Biroq bu ham uzoqqa cho`zilmaydi.
Murojaatni o`rganar ekanmiz, hududga tuman suv ta`minoti korxonasi hamda obodonlashtirish bo`limi rahbarlari kelib vaziyatga oydinlik kiritishdi. Ularning so`zlariga ko`ra, quvur yotqizish uchun boshlangan ishlar keyingi yilga ham o`tuvchi ob`ekt hisoblanib, ayni paytda ushbu yilga ajratilgan mablag` sarflab bo`lingan.
- Mazkur quvur yotqizish ishlari investisiya dasturi asosida amalga oshirilayotgan bo`lib, ayni paytga qadar joriy yilda ajratilgan 987 million so`mlik ishlar bajarib bo`lingani bois ish to`xtatilgan, deydi tuman suv ta`minoti boshlig`i Toshtemir TANGRIEV. – Loyihaga ko`ra, kelgusida mazkur tarmoq orqali har bir xonadonga ichimlik suvi kirib boradi. Ya`ni mavjud 3 ta mahalla aholisi to`liq ichimlik suvi bilan ta`minlanadi.
Yo`llardagi notekislik haqida gap borarkan, aholi ichki yo`llarning bundanda yomon ahvolda ekanligini ma`lum qilishdi. Ayniqsa, bolalarning maktabga qatnashida yog`inli kunlarda loyga botib qolayotgani qator muammolarga sabab bo`layotgan ekan. Tuman obodonlashtirish bo`limi boshlig`ining so`zlariga ko`ra, ayni paytgacha tumandagi ichki yo`llarni tartibga solish borasida sezilarli ishlar olib borilmoqda. Xususan, “Xoniyon” mahallasidagi “Nurafshon” ko`chasida 300 metr qismi 4,5 metr enlilikda asfalt qilib berildi.
-Tumanda 58 ta mahalla bor. Ana shu 58 ta mahallada 1366 kilometr ichki yo`llar bor, -deydi tuman obodonlashtirish bo`limi boshlig`i ilhom... . – Har yili ajratilgan mablag`lar asosida ushbu yo`llar bosqichma-bosqich ta`mirlab kelinayapti. Joriy yilning o`zida 40 kilometr yo`lga qum-shag`al, 26 kilometrga asfalt yotqizildi. Tan olish kerakki, ushbu mahallalardagi ayrim yo`llar ta`mirlanmagan, hatto tuproq yo`llari ham mavjud. Biroq hududdagi markaziy ko`cha Qarshi tumani yo`llardan foydalanish korxonasi balansida bo`lib, ta`mirlashga qo`yilgan. Ma`lum qismi ta`mirlab ham berilgan. Tizimga kiritilgan yangi o`zgarishlar, ya`ni “Open budjet” tizimi asosida endilikda yo`llar jamoatchilik fikri asosida ta`mirlanishi yo`lga qo`yilmoqda. Shunga ko`ra, kelgusi 2022 yilda mahalla “Obod qishloq” dasturiga kiritilishi to`g`risida taklif berilgan. Agar bu amalga oshadigan bo`lsa, hududdagi yo`llar to`liq ta`mirlab beriladi.
Muammoni o`rganish chog`ida mahalla mutasaddilari haqiqatdan ham hududni dasturga kiritish to`g`risida tuman hokimligiga murojaat qilishganini ma`lum qilishdi. Qolaversa, maqolani tayyorlash jarayonida, tuman hokimligi yaqin fursatlarda asosiy yo`lni ta`mirlash ishlarini boshlashini ma`lum qilishdi.
Xulosa o`rnida aytish mumkinki, muammo bor joyda echim ham bo`ladi. Faqatgina muammoga o`z vaqtida e`tibor qaratish, xalqning fikriga quloq tutish lozim bo`ladi. Biz ham muammolar hal bo`lgach, mavzuga yana qaytamiz.
Shavkat AMINOV
