“O`zbekneftgaz” AJ Boshqaruv raisi Mehriddin Abdullaev boshchiligidagi “Ishchi guruh” a`zolari Buxoro viloyatida joylashgan Gazli neft va gaz qazib chiqarish boshqarmasida bo`lib, olib borilayotgan ishlar holatini o`rgandi.
Uglevodorod zaxiralarini oshirish, uglevodorodlar qazib chiqarish geologo-texnik tadbirlar doirasida quduqlarini burg`ilash, kapital ta`mirlash va texnologik ob`ektlarni ishga tushirish borasida olib borilayotgan chora-tadbirlar, ularning samaradorligi hamda amalga oshirilayotgan loyihalar ijrosi holati bo`yicha o`rganishlar o`tkazildi.
Gazli neft va gaz qazib chiqarish boshqarmasi tomonidan 2022 yilda 4,6 mlrd.kub metr tabiiy gaz va 150,0 ming tonna suyuq uglevorodlar qazib olish rejalashtirilgan bo`lib, buning uchun chora-tadbirlarni belgilangan muddatlarda amalga oshirish zarurligi ta`kidlandi.
Ta`kdlash kerakki, ko`rsatkichlarga erishish uchun boshqarmada 2022 yil davomida tabiiy gaz qazib chiqarish reja ko`rsatkichlarining bajarilishini ta`minlashga qaratilgan jami 133 ta geologo-texnik tadbirlar amalga oshiriladi, bunda 6 ta yangi gaz quduqlari burg`ilashdan ishga tushiriladi, 121 ta mavjud gaz quduqlarida kapital ta`mirlash va intensifikasiya ishlari olib boriladi hamda 6 ta texnologik ob`ektlar ishga tushiriladi.
Boshqaruv raisi boshchiligidagi “Ishchi guruh” a`zolari Gazli boshqarmasi rahbariyati bilan “Doyaxotin” konidan Gazli gazni qayta ishlash zavodigacha diam.1020 mm lik 47 km uzunlikdagi gaz quvurini qurilish ishlari bilan tanishdi.
Hozirgi kunda loyihaning 1-bosqichi bo`yicha 31 km qismida payvandlash ishlari yakunlangan bo`lib, suv bilan sinash ishlari olib borilayotgan bo`lsa, 2- bosqichi 12 km dan 90 foizdan ortiqroq qismida payvandlash ishlari yakunlangan, qurilish-montaj ishlari davom ettirilmoqda.
Ushbu gaz quvurini qisqa muddatlarda ishga tushirish bo`yicha Boshqaruv raisi o`rinbosarlariga, departament va boshqarma boshliqlariga ko`rsatmalar berildi. Pudratchi tashkilot tomonidan zarur quvur armaturalarini etkazib berishni tezlashtirish va montaj ishlarini yakunlash bo`yicha vazifalar belgilandi.
Geologo-texnik tadbirlar doirasida konlarda quduqlarni burg`ilash va kapital ta`mirlash ishlari bilan tanishish maqsadida, “Doyaxotin” koni 104-sonli burg`ilashdan ishga tushirilgan ishlatish qudug`i, 106-sonli yangi ishlatish qudug`ini burg`ilash ishlarini boshlash jarayonlari va 94-sonli qudug`ida olib borilayotgan kapital ta`mirlash ishlari bilan tanishildi.
Kuz-qish mavsumida ham uglevodorodlar qazib chiqarishni barqarorligini ta`minlash maqsadida, qo`shimcha chora-tadbirlarni amalga oshirish, ya`ni quduqlar uchun burg`ilash dastgohlarini jalb qilish bilan burg`ilash ishlarini jadallashtirish, quduqlarni kapital ta`mirlash ishlariga boshqa hududlardan ta`mirlash uskunalarini mobilizasiya qilish orqali ularning sonini ko`paytirish orqali geologo-texnik tadbirlarni amalga oshirishni tezlashtirish bo`yicha tegishli departament boshliqlari va boshqarma rahbariyatiga vazifalar belgilandi.
“Uchqir” konida likvidasiya fondidagi yana 10 ta quduqlarda kapital ta`mirlash ishlarini olib borish bilan ishlatish fondiga qaytarish orqali konning 16-gorizont qatlamidan tabiiy gaz qazib olishni ta`minlash bo`yicha “O`zneftgazquduqta`mirlash” AJ rahbariyatiga alohida topshiriq berildi.
Texnologiya yo`nalishida, “Tayloq” konining 1-,2-gaz yig`uv joylaridan “Qumli” gazni dastlabki tayyorlash qurilmasiga bo`lgan gaz quvurlarining quvvatini oshirish bilan gaz qazib chiqarishni ko`paytirish maqsadida jami 12 km uzunlikdagi qo`shimcha quvurlarni qurish ishlarini jadallashtirish masalasi ham muhokama qilinib mas`ullarga zarur ko`rsatmalar berildi.
O`rganish davomida, Gazli regionidagi konlar va maydonlarning qӯshimcha imkoniyatlarini ӯrganish bo`yicha olib borilayotgan geologiya-qidiruv ishlari, jumladan 3D seysmik ishlarni jadallashtirish va bu orqali “Uchqir”, “G`arbiy”, “Tayloq” va “Parsanko`l” konlarining yangi istiqbollarini aniqlash, 2 ta yangi maydonlarda izlov-qidiruv yo`nalishida burg`ilash ishlarini olib borish va 3 ta quduqlarni burg`ilash bilan tugatish rejalari muhokama qilindi.
“Andakli El-Omon” va “Manguberdi” kabi bir qator istiqbolli maydonlarda burg`ilash ishlarini jadallashtirish orqali uglevodorodlar zaxiralarini o`stirishni ta`minlash bo`yicha tegishli boshqarma va departament boshliqlariga vazifalar berildi.
