AQShning Indiana tibbiyot universiteti tadqiqotchilari ba`zi antibiotiklar nima uchun eshitish qobiliyati yo`qolishiga sabab bo`lishini aniqladi. Bu haqda Sog`liqni saqlash vazirligi Matbuot xizmati xabar bermoqda.
Qayd etilishicha, aminoglikozidlar tabiiy va yarim sintetik antibiotiklar guruhi hisoblanadi. Ular qariyb 100 yildirki, infeksiyalarni davolashda qo`llanib kelinmoqda.
Chunki ushbu preparatlar arzonligi va tez ta`sir ko`rsatishi bilan ajralib turadi. Shu bois muolaja jarayonida undan keng foydalanish ommalashgan.
Mutaxassislar xulosasiga ko`ra, aminoglikozidlar 20-47 foiz bemorlarda quloqlardagi eshitish analizatorining bir qismi bo`lgan hujayralar o`limiga olib kelishi mumkin. Qolaversa, bunga dori vositalarining toksik xususiyatlari ham sabab bo`ladi.
Tadqiqot mualliflari ushbu jarayonning asosiy biokimyoviy hamda molekulyar mexanizmlarini o`rgandi. Ma`lum bo`lishicha, mazkur guruhga mansub antibiotiklar hujayralarda eshitishni qabul qilishda ishtirok etadigan RIPOR2 oqsiliga ta`sir o`tkazadi.
Oqibatda ayni shu oqsil o`z o`zini yo`q qilish, ya`ni autofagiya jarayoniga kirishadi va quloqlarning eshitish qolbiliyati yo`qola boradi.
Izlanuvchilarning qayd etishicha, ushbu yangilik antibiotiklar nojo`ya ta`sirini bartaraf etishga qaratilgan muolaja choralarini ishlab chiqishda qo`l kelishi mumkin.