Ebola — kam uchraydigan, ammo juda xavfli virusli kasallik bo‘lib, ko‘p hollarda o‘limga olib keladi. U insonga qon, qusuk va boshqa tana suyuqliklari orqali yuqadi.
Mutaxassislar ma’lumotiga ko‘ra, kasallik ilk bor zararlangan hayvonlar, ayniqsa mevaxo‘r ko‘rshapalaklar orqali insonga o‘tadi. Simptomlar 2 kundan 21 kungacha bo‘lgan muddatda paydo bo‘lishi mumkin.
Ebolaning dastlabki belgilari grippga o‘xshaydi: isitma, bosh og‘rig‘i va charchoq. Keyinchalik qusish, ich ketishi, a’zolar faoliyatining buzilishi va ba’zi hollarda ichki yoki tashqi qon ketishi kuzatiladi.
JSST ma’lumotiga ko‘ra, Ebolaga qarshi aniq davo hozircha yo‘q. O‘rtacha o‘lim darajasi taxminan 50 foizni tashkil etadi. Ayrim shtammlar uchun vaktsina mavjud, ammo "Bundibugyo" turiga qarshi vaktsina hali ishlab chiqilmagan.
So‘nggi 50 yil ichida Afrikada taxminan 15 ming kishi Ebola qurboni bo‘lgan. Kongo Demokratik Respublikasidagi eng yirik epidemiya 2018–2020 yillarda kuzatilib, qariyb 2300 kishi vafot etgan.
