Avval xabar qilinganidek, O`zbekiston Respublikasi Kinematografiya agentligi va Ozarboyjon Respublikasi Madaniyat vazirligi tashabbusi bilan Boku shahrida O`zbek kinosi kunlari bo`lib o`tmoqda.
Boku shahridagi Nizomiy nomli kino saroyida O`zbekiston kinosi kunlarining ochilish marosimi bo`lib o`tdi.
Tadbirda O`zbekiston Kinematografiya agentligi delegasiyasi , Ozarboyjon Madaniyat vazirligi, O`zbekistonning Ozarbyjondagi elchixonasi vakillari, kino ixlosmandlari ishtirok etishdi.
Tadbirni O`zbekiston Respublikasi Kinematografiya agentligi bosh direktori Firdavs Abduxoliqov kirish so`zi bilan ochdi.
“Keyingi yillarda O`zbekiston Respublikasi Prezidenti Shavkat Mirziyoev hamda Ozarboyjon Respublikasi Prezilenti Ilhom Aliev tashabbuslari bilan mamlakatlarimiz o`rtasidagi madaniy aloqalar ham yangi bosqichga ko`tarilmoqda. Ikki mamlakatda milliy kino kunlarini o`tkazish yaxshi an`anaga aylandi. Bundan keyin ham kinoijodkorlarimiz o`rtasidagi madaniy hamkorlikni rivojlantirish uchun barcha imkoniyatlarni ishga solishga tayyormiz”, - dedi Firdavs Abduxoliqov.
Ochilish marosimida O`zbekistonda xizmat ko`rsatgan artist Lola Eltoeva, o`zbekistonlik taniqli kinorejissyor Eldor Mamedov, Ozarboyjon davlat film fondi direktori Jamil Guliev va boshqalar ikki mamlakat kinoijodkorlari hamkorligi xususida to`xtalib o`tdilar.
Qayd etilganidek, Ozarboyjon kinosining benazir namunalari kirib bormagan o`zbek xonadonini topish mushkul. Ozarboyjon kinoustalari tomonidan yaratilgan “Arshin mol-olon”, “Qaynona” singari o`lmas filmlarni o`zbek tomoshabinlari bugun ham zavq-shavq bilan tomosha qilishadi. “Tohir va Zuhra”, “O`tgan kunlar", “Toshkent – non shahri”, kabi o`zbek kino kartinalari qardosh tomoshabinlar uchun ham qadrdon bo`lib qolgan.
O`lmas Alixo`jaev Shukur Burxonov, Tamara Shokirova singari o`zbek aktyor va aktrisalari Ozarboyjon kartinalarida rol o`ynagan bo`lishsa, Rasim Balaev, Tariel Gasimov singari Ozarboyjon san`atkorlari o`zbek filmlarida betakror obrazlar yaratishgan. O`zbek va ozarboyjon kinoustalari hamkorligida yaratilgan "Uchrashuv", "Qizil poezd", “Sherali va Oybarchin” badiiy filmlari minglab tomoshabinlar qalbidan joy olgan.
2021 yilda O`zbekiston Prezidenti tashabbusi bilan qayta tiklangan “Ipak yo`li durdonasi” Toshkent xalqaro kinofestivalida ozarboyjonlik kinoijodkorlar faol ishtirok etib kelishmoqda. Ayni damda ikki davlat kinoustalari hamkorligida Xo`ja Nasriddin haqida badiiy filmi suratga olinmoqda.
O`zbekiston kinosi kunlari o`zbekistonlik kirorejissyor Eldor Mamedov suratga olgan "Azaliy do`stlik va qardoshlik" hujjatli filmi bilan boshlandi. Filmda ikki xalq o`rtasidashi tarixiy va madaniy alaqalar, mushtarak qadriyatlar, har ikki mamlakat o`rtasidagi do`stona aloqalar haqida hikoya qilinadi.
Kino kunlari doirasida ozarboyjonlik kino muxlislariga "Ayol qismati", ,"Baron 2: Sog`inch", "Maqsud Shayxzoda" singari badiiy va hujjatli filmlar namoyish etilishi kutilmoqda.
Shuningdek, kino kunlari doirasida 7 dekabr kuni o`zbekistonlik kinoijodkorlarni Ozarboyjon Respublikasi Madaniyat vaziri Anar Karimov qabul qildi.
O`zbekiston Respublikasi Kinematografiya agentligi bosh direktori Firdavs Abduxoliqov samimiy qabul uchun minnatdorlik bildirib, ikki xalq o`rtasidagi madaniy aloqalar uzoq tarixga borib taqalishini qayd etdi.
O`zi navbatida Anor Karimov kino sohasida yangi-yangi loyihalarni hamkorlikda amalga oshirish uchun tayyor ekanini bildirdi.
Ozarboyjonda O`zbekiston kinosi kunlari davom etmoqda.
