Joriy yilning 18-25 iyun kunlari Ozarbayjon Respublikasining Boku shahrida “Mug`om olami” VI xalqaro festivali o`tkazildi va unda yurtimiz vakillari munosib ishtirok etib, sovrinli o`rinlarni qo`lga kiritdi. Bu haqda Turizm va madaniyat vazirligi axborot xizmati xabar bermoqda.
Aytilishicha, ushbu xalqaro festivalda Ozarbayjon, O`zbekiston, Turkiya, Eron, Misr kabi 20 dan ortiq davlatlardan 70 nafardan ortiq qatnashchilar ishtirok etishgan.
Mazkur festival ikki turdan iborat o`lib, tur yakunlariga ko`ra, festivalda Yunus Rajabiy nomidagi O`zbek milliy musiqa san`ati instituti “Maqom xonanadaligi” kafedrasi o`qituvchisi, O`zbekistonda xizmat ko`rsatgan artist Mohichehra Shomurodova Gran-Pri, mazkur institutning “Maqom cholg`u ijrochiligi” kafedrasi 2-bosqich talabasi Shohjahon Yoriev 2-o`rinni hamda Buxoro namunali maqom ansambli xonandasi Do`stmurod Negmurodov 3-o`rinni egalladi.
Xalqaro festivalda g`olib bo`lgan O`zbekistonlik ishtirokchilarni 2023 yil 27 iyun kuni soat 02:30 da Islom Karimov nomidagi Xalqaro aeroportida tantanali kutib olindi.
Tantanali kutib olish marosimida madaniyat va turizm vaziri O.Nazarbekov, O`zbek Milliy maqom san`ati markazi direktori S.Begmatov, taniqli san`atkorlar O`zbekiston xalq artistlari Munojat Yo`lchieva, Abduhoshim Ismoilov va boshqa ijodkorlar, maqom ansambli, raqqoasalar, karnay-surnay jamoasi ommaviy axborot vositilari vakillari qatnashdi.
O`tkazilgan qisqacha mitingda so`z olgan madaniyat va turizm vaziri O.Nazarbekov festival ishtirokchilarini muvaffaqiyatlar bilan qutladi:
"Bu har qancha olqishga, har qancha e`tirofga, hurmat va ehtiromga loyiq natijadir!
Tabiiyki, “Bunday muvaffaqiyatlarning zamirida nima yotibdi?”, degan haqli savol o`rtaga tashlansa, men hech ikkilanmay aytgan bo`lardimki: bu hurmatli Prezidentimiz Shavkat Miromonovichning madaniyat va san`at sohasiga, xususan, maqom san`atini rivojlantirishga qaratayotgan yuksak e`tiborlari natijasidir.
Aynan davlatimiz rahbari tufayli maqom san`ati yana xalqimizga qaytdi. O`zbek milliy maqom san`atini rivojlantirish bo`yicha alohida qaror qabul qilinib, katta ishlar boshlandi. Xalqaro maqom san`ati anjumani tashkil etildi. O`zbek milliy maqom san`ati markazi faoliyati yo`lga qo`yildi. Ta`lim muassasalarida maqom sirlari o`rgatilmoqda. Va, albatta, ana shu ezgu ishlar bugun o`z mevalarini bermoqda. Ta`bir joiz bo`lsa, men Yangi O`zbekiston davrini maqomning qayta tug`ilgan davri degan bo`lardim.
Fursatdan foydalanib, xalqaro festivalda Vatanimiz nomini ulug`lashga munosib hissa qo`shgan barcha ijodkorlarimizga chin dildan tashakkur izhor qilaman! G`olib san`atkorlarimizning ustozlariga, oila a`zolariga ham minnatdorlik bildiraman".
Ma`lumot uchun: “Mug`om olami” VI xalqaro festivali mug`om va unga yaqin bo`lgan musiqalar (maqom, muqam va boshqalar) ijrochilari o`rtasida har ikki yilda o`tkaziladi. Festivalning tashkilotchilari Haydar Aliev jamg`armasi, Ozarbayjon madaniya va turizm vazirligi va Ozarbayjon kompozitorlar uyushmasi hisoblanadi. Mazkur festival birinchi marta 2009 yil 15-25 mart kunlari Boku shahrida o`tkazilgan.
