Toshkentdagi "Kinochilar uyi"da “Abdulla Oripov” badiiy filmining katta premerasi o`tkazildi. Premerada dastlab Kinematografiya agentligi direktori Firdavs Abduxoliqov, Abdulla Oripovning rafiqasi Hanifa Mustafaeva va film ijodkorlari sahnaga taklif etildi. Agentlik direktori Prezident topshiriqlari asosida yaratilgan filmni suratga olishda ko`mak bergan barcha ijodkorlarga samimiy tashakkurini izhor qilib, premerani ochib berdi.
Shundan so`ng Abdulla Oripovning rafiqasi Hanifa aya Mustafaeva sahnaga chiqib, hissiyotlari bilan bo`lishdi.
«Film suratga olingani uchun prezident Shavkat Mirziyoevga, kinoijodkorlarga rahmat aytaman. Bu voqea men uchun ham iztirobli, ham faxrli. Tasavvur qilishim qiyin», — dedi Hanifa aya va shoirning so`nggi yillarda bitilgan «Imtihon» she`rini katta sahnada o`qib eshittirdi.
Filmda Abdulla Oripovning Qashqadaryo viloyati Koson tumani Neko`z qishlog`ida o`tgan va ijodga ilk qadam qo`ygan bolalik yillari, Toshkent shahrida o`tkazgan talabalik davrlari, ijod namunalarining ilk nashri, uning shoir bo`lib shakllanishidagi hissiyotlari va tuyg`ulari, shoirga xos sevgisi, mashhurlikning kelishi va Amerikada o`tgan so`nggi yillari ochib beriladi.
Filmda bosh rollarni «Do`stlik» ordeni sohibi, Abdulla Oripovning shogirdi, shoir Shodmonqul Salom va mahoratli aktrisa Rayhon Asadova ijro qilgan. Shuningdek, Abdulla Oripovning keksalik davrini O`zbekiston Respublikasida xizmat ko`rsatgan artist, Surxondaryo teatri aktyori Qudratilla Burxonov, shoirning rafiqasi Xanifa Mustafoeva rolini esa O`zbekiston xalq artisti Gulchehra Jamilova ijro qilgan.
Film bosh rejissyori Muzaffarxon Erkinov, ssenariy mualliflari Abduqayum Yo`ldoshev va Muqaddas Usmonova (Minxojiddin Mirzo, Furqat Usmonov ishtirokida), bosh operator Ravshan Mirzakamolov, Bosh muharrir Erkin A`zam, Badiiy rahbar Shuhrat Rizaev, bosh prodyuser Firdavs Abduxoliqov.
«Abdulla Oripov - O`zbekiston qahramoni, O`zbekiston Xalq shoiri badiiy filmiga keladigan bo`lsak, buning mas`uliyati bir necha hissa balandroq bo`ldi. Qaysi ma`noda? Abdulla Oripov yaqinda yashab o`tgan insonlardan. U kishining ayollari, farzandlari, shogirdlari hayot. Barchada o`zining «Abdulla Oripov»i bor.
Abdulla Oripovning ismi bevosita Mustaqillik bilan uyg`unligini his qildim ushbu filmda. Film bitgandan keyin ham shu narsaga amin bo`ldim-ki, bu film nafaqat Abdulla Oripov, balki Mustaqillik to`g`risida ham film bo`lib qoldi. O`zim ham ko`rganda shuni aytdim. Chunki o`zimizning tarix, bir shoirni taqdiri orqali O`zbekiston tarixi ham qaysidir ma`noda ochishga xarakat qildik», - deydi film rejissyori Muzaffar Erkinov.
Ma`lumot uchun, ushbu film 1 sentyabr kuni barcha telekanallarda efirga uzatilishi aytib o`tildi.
