Oilaning buzilishini hech kim hech qachon istamaydi. Lekin shunga qaramay qanchadan qancha oilalarning darz ketayotganiga guvohmiz. Bunga goh er, goh xotin, gohida qaynona-qaynotalar ham sababchi bo`ladi. Er-xotin bir-birini sevadi, bir-biri uchun yashaydi. Faqat bular ro`zg`or va farzandlar tashvishi orqasida qolib ketgan. Hayot sinovlari ikki qalb o`rtasidagi ilohiy tuyg`uni uzmay, aksincha, mustahkamlaydi. Bunga bardosh bera olish esa har kimning o`z qo`lida...
Muxlislarimizga O`zbekistonda xizmat ko`rsatgan artist Mahmud ISMOILOV javob beradi:
«Poezdda opasinikiga jo`navoribdi»
Turg`unbek, 38 yosh, Jizzax viloyati:
— O`n besh yil avval ota-onam tanlagan qizga uylanganman. Ular sovchilikka borgan qiz menga ham yoqqan. Toshkentda universitetda o`qiganman, xotinim esa maktabni bitirib, chevarchilik hunarini egallagan. Ayolim saranjom-sarishta, ota-onamga va oilamdagilarga mehribon. Ikki farzandimizni ham oq yuvib, oq tarab katta qilyapti. Bir qarashda hamma bizni baxtli oila deb o`ylaydi. Lekin aslida unday emas... Hammaga mehri cheksiz ayolim menga kelganida doim baqiroq, injiq, kayfiyatsiz bo`lib qoladi. Men bilan hech ham ochilib gaplashmaydi. Ish buyursam ko`nglimdagidek bajarmaydi, doim gap qaytaradi. Undan ko`p narsa talab qilmayman, ishdan kelganimda kulib kutib olsin, yonimda gaplashib o`tirsin deyman. Hech kimdan kam joyi bo`lmasa. Tinimsiz mehnat qilayotgan erining ko`ngliga qarash shunchalik qiyinmi? Sabr kosamni yaqinda qilgan qilig`i to`ldirdi. Uzoq viloyatga kelin bo`lib tushgan opasi qiz chiqaryapti. To`ydan yigirma kun oldin ketamanga tushdi. Shuncha ertadan borib senga nima bor, to`yga to`rt-besh kun qolganida birga boramiz desam jahl qildi. Keyin ishdan qaytsam, narsalarini yig`ishtirib, poezdda opasinikiga jo`navoribdi. Bolalarni esa qarovsiz tashlab ketibdi. Rosa jahlim chiqdi. Bunday xurmacha qiliqlaridan to`yib ketdim, xotinimni yo`lga solishning iloji yo`q deb o`ylayman…
Maslahat: — O`n besh yil birga yashab, hamon bir-biring fe`l-atvoriga ko`nikmaganlari va moslashmaganlari meni hayron qoldirdi. Sizga yagona maslahatim, ayolingiz bilan gaplashib oling. Suhbatingiz davomida baqirmasdan, tinchgina gaplashishga harakat qiling. Bu suhbat bolalar ishtirokisiz o`tgani yanada ma`qul. Bir-biringizdan nima istayotganingizni oshkora ayting, nima qoniqtirmayotgani, nimalar sizning jahlingizni chiqarishini istihola qilmasdan gapiring. Shundagina o`rtadagi tushunmovchiliklar barham topadi. Endi sizlar o`zingizni emas, aksincha voyaga etkazayotgan farzandlaringiz haqida o`ylashingiz kerak.
«Sevgan qizimni ko`rib qoldim»
Asqar, 29 yosh, Sirdaryo viloyati:
— Institutni bitirib, poytaxtda qoldim. Yaxshi ishga joylashdim. Ishxonada birga ishlaydigan bir qizni yoqtirib qoldim. U avval turmushga chiqib, eri bilan uch oy birga yashab, ajrashgan ekan. Onam yo meni deysan, yo o`sha qizni deganida chorasiz ahvolda qoldim. Tez orada tumanimizdan birovning uyiga sovchilikka borib, men ko`rmagan, bilmagan qizga unashtirishdi. Turmush qurganimizga uch yil bo`ldi, poytaxtdagi ishimdan bo`shab, yoqtirgan qizim bilan ham aloqalarimni uzganman. Viloyatimizdan ish topib, shu erda ishlayapman. Ayolim chiroyli, esli-hushli. Pazandaligi onamni juda xursand qiladi. Kelinlarini doim maqtab o`tiradilar. Xotinim o`g`il tug`ib berganidan keyin ko`nglim iligandek bo`ldi. Lekin yaqinda ishxonamdan Toshkentga safarga bordim. Ish yuzasidan bir tashkilotga borganimda, o`zim yoqtirgan qizni ko`rib qoldim. Biroz gaplashib turdik, suhbat davomida uning hali ham turmushga chiqmaganini, mendan umidini uzmaganini bildim. Poytaxtda ishim bo`lmasa-da, shu qizni deb yana uch kun ushlanib qoldim. Bu voqea xayolimni, to`yg`ularimni ostin-ustun qilib yubordi. Maslahatga muhtojman...
Maslahat: — Erkak kishi ayolini nikohiga olar ekan, uning kelajakdagi hayoti, taqdiri uchun mas`uliyatni o`z bo`yniga oladi. Ana shu mas`uliyatni unutib qo`yibsiz. Ayolingiz sizga o`zini bag`ishlab, oilangizning xizmatini qilib yuribdi, sizni “Ota” degan sharafli nom bilan siylabdi, eng keraklisi, ota-onangizning ko`ngillaridan joy olibdi. Siz-chi? Shularning evaziga uni tashlab ketmoqchimisiz? Xayolingizni, fikrlaringizni tartibga keltiring. O`tkinchi havasga berilmang. His-tuyg`ularingizni deb, farzandingizni etim, ota-onangizni norozi, ayolingizni bebaxt qilmang. Maslahatim, oilangizga sodiq bo`ling.
«Kelinoyim bilan janjallashadi»
Javlon, 28 yosh, Urganch shahridan:
— Ota-onam uylanish haqida gap ochishganida yoqtirgan qizim borligini aytganman. Oilamdagilar qarshilik bildirishmagan, “Sevganing bo`lsa undan ham yaxshi, bir-biringni tushunib yashaysanlar”, deb onam xursand bo`lgandi. Sovchilikka borganlarida yoqtirgan qizimning oyisini onam unchalik xushlamagan. Baxtimdan sarmast holda osmonlarda uchib yurardim. Lekin kelinchagim to`yimizga bir oy bo`lmasdan katta kelinoyim bilan arazlashib, uyiga ketib qoldi. Ayb kimdan o`tganligini bilmayman. Kelinoyim to`rt yildan buyon biz bilan yashaydi. Shu vaqt davomida hech birimizga yomon gapirmagan. Onam bilan ayolimni olib keldik. Ayolim tez orada homilador bo`ldi. Ko`pincha tobi bo`lmaydi, uni asrab-avaylayapmiz. Biroq kelinoyim bilan hanuzgacha til topisholmadi. Akam men uylanishimdan avval o`zi uchun er sotib olib, hovli qurishni boshlagandi. Hovlisi bitib qolganini eshitgan xotinim shu uyga biz ko`chib chiqamiz, deb uyda janjal boshlagan. Sevganim bo`lsa ham, uning erkaliklaridan, onasining hamma ishimizga aralashuvidan charchab ketdim. Nima qilishga hayronman...
Maslahat: — Xalqimizda yozilmagan qoida bor, ota-ona bilan kenja farzand qoladi degan. Ayolingizga shuni eslatib qo`ying. Hamma o`z mehnatiga yarashasini oladi. Akangiz va kelinoyingiz mehnat qilib, uy qurishibdi, endi ular o`sha uyda rohatlanib yashashga munosiblar. Xotiningiz aka-uka, ota-ona va farzand o`rtasiga sovuqchilik tushirishni istamasa, bu qiliqlarini yig`ishtirsin. Qaynona-qaynotasining xizmatidan og`rinmasin. Agar ayolingizga sizlarning gaplariingiz og`ir botsa, uni faqat o`z ota-onasi yo`lga sola oladi. Buning uchun siz qaynotangiz bilan bafurja gaplashing. Uyingizdagi janjal faqat kelinlar o`rtasida bo`lsa, akangiz oilasi bilan ko`chib ketsa, bu janjallar ham barham topadi. Arzimagan muammolarni deb oilangizning tinchligini buzmang. Sizga va ayolingizga faqat sabr qiling deb ayta olaman.
Dilnoza MIRTOLIPOVA yozib oldi
