Sinema San’atlari va ilmiy Akademiyasi (Academy of Motion Picture Arts and Sciences) tomonidan e’lon qilingan yangi qoidalarga ko‘ra, sun’iy intellekt (SI) texnologiyasi qo‘llanilgan filmlar ham endilikda “Oscar” mukofotlari uchun nomzod bo‘lishi mumkin.
Ma’lum qilinishicha, 2025-yildan boshlab kuchga kiradigan ushbu yangi tartibga ko‘ra, SI ishtirokida yaratilgan filmlar ham muayyan shartlarga javob bersa, mukofotlarga da’vogarlik qilishi mumkin.
Biroq g‘oliblarni aniqlashda hakamlar hay’ati filmda inson ijodining qanchalik ishtirok etganiga alohida e’tibor qaratadi.
Shuningdek, Akademiya yangi qoida sifatida hay’at a’zolariga final bosqichida ovoz berish huquqiga ega bo‘lishlari uchun barcha nomzod filmlarni to‘liq tomosha qilishni majburiy qilib belgiladi.
Ma’lumot uchun, joriy yilda 97-marta o‘tkazilgan Oscar taqdirlash marosimida “Eng yaxshi operatorlik ishi” va “Eng yaxshi erkak roli” kabi yo‘nalishlarda g‘olib bo‘lgan “The Brutalist” filmi tarkibida sun’iy intellektdan foydalanilgani bois jamoatchilik tanqidiga uchragan edi.
Eslatib o‘tamiz, 2023-yilda Gollivud aktyorlari va ssenariy mualliflari sun’iy intellekt ularning ish o‘rniga o‘tib ketishi mumkinligidan xavotirlanib, ish ta’minoti yuzasidan olib borilgan muzokaralar natijasiz yakunlangach, norozilik sifatida ommaviy ish tashlashga chiqqan edi.
