Shahrisabz tuman sudida 2024 yilda Rossiya Mudofaa vazirligi bilan shartnoma tuzib, Ukrainadagi janglarda ishtirok etgan O‘zbekiston fuqarosiga nisbatan hukm chiqarildi.
Fuqaro 2024 yil 26 avgustdan boshlab urushda qatnashgan, ikki marta og‘ir yaralangan va 2025 yil fevral oyida O‘zbekistonga qaytib, DXXga murojaat qilgan.
Sud unga Jinoyat kodeksining 154-moddasi asosida ayb qo‘yib, 4 yil muddatga ozodlikni cheklash jazosi tayinladi.
Sud yengil jazo tayinlashda uning pushaymonligi, nogiron farzandi borligi va oilasidagi yagona boquvchi ekani kabi holatlarni inobatga oldi.
Unga Qashqadaryo viloyatidan chiqmaslik, yashash manzilini o‘zgartirmaslik va Rossiya harbiylariga aloqador shaxslar bilan muloqot qilmaslik kabi cheklovlar belgilandi.
