1 oktyabrdan boshlab Qozog‘iston Respublikasida mashhur o‘zbek seriali "Qizim" ("Mening qizim") namoyish etila boshladi. Serialni namoyish etish huquqini mamlakatning yirik telekanallaridan biri — "Qozog‘iston" telekanali eksklyuziv tarzda qo‘lga kiritdi.
"Qizim" O‘zbekistondagi eng yirik prodyuserlik kompaniyalaridan biri — Cinemedia tomonidan suratga olingan bo‘lib, avvalroq "Sevimli" telekanali orqali efirga uzatilgan va tomoshabinlardan yuqori — 10/10 reytingni olgan.
Serial 2024 yilda ekran yuzini ko‘rgan bo‘lib, 80 qismdan iborat bir mavsumni o‘z ichiga oladi. Rejissyor — Samidxon Lutfullayev, ssenariy muallifi — Go‘zal Muhammadova. Asarda Ra’no Shodiyeva, Ra’no Zokirova, Javohir Zokirov, Mehriddin Rahmatov kabi mashhur aktyorlar ishtirok etgan.
Drama uch ayol — Diyora, Gavhar va Nigina hayotida yuz beradigan sinovlar, murakkab tanlovlar va insoniy qadriyatlar haqida hikoya qiladi. Serial sevgi, oilaviy munosabatlar va axloqiy qarorlarning oqibatlarini yoritib, tomoshabinlarni chuqur mushohadaga chorlaydi.
