Gaz, elektr energiyasi va ichimlik suvi ta`minoti hamda yo`l qurilishi sohasidagi masalalarni tashqi qarz hisobigagina hal qilish mumkin. Tashqi qarzning o`sib borayotgani xavotirli emas, dedi Bosh vazir o`rinbosari, moliya vaziri Jamshid Qo`chqorov. Bu haqda Kun.uz ma`lum qildi.
Vazirning ta`kidlashicha bugungi kunda tashqi qarzimiz 15,1 mlrd dollarni tashkil qilyapti. Yalpi ichki mahsulotdan tushgan daromad 58 mlrd dollar bo`ladigan bo`lsa, tashqi qarz YaIMning taxminan 25 foizi atrofida. Davlat tashqi qarzining YaIMga nisbatan 25 foiz bo`lishi tashvishlanadigan masala emas.
Qo`chqorovning ta`kidlashicha, tashqi qarz 2020–2022 yillarda ham anchagina o`sadi. Lekin kelayotgan uch yilda tashqi qarz o`sadi degani bu jarayon doim shunday davom etadi degani emas. Xalqaro valyuta jamg`armasi va Jahon banki fikriga ko`ra davlat tashqi qarzi YaIMga nisbatan 50-55 foiz atrofida bo`lishi barqaror holat hisoblanadi. Shuning uchun tashqi qarz 50 foizga borishidan hushyor bo`lsak bas.
Agar tashqi qarz o`sib, YaIM o`smasa, bu bankrotlikka olib keladi. 2018 yilda yalpi ichki mahsulotimiz 50 mlrd edi, 2019 yilda 58 mlrd bo`ldi. Besh yildan keyin nasib etsa 100 mlrd bo`lishi mumkin. Yuz milliardning 50 foizi 50 mlrd bo`ladi va bu degani chetdan bemalol shu miqdorgacha qarz olishimiz mumkin”, dedi Jamshid Qo`chqorov.
Moliya vaziri, shuningdek, O`zbekistonning oltin-valyuta zaxiralari bilan bog`liq vaziyat haqida ham tushuntirish berdi.
“2019 yilda oltin-valyuta zaxiralarimiz ikki milliardga ko`paydi. To`g`ri, bu asosan oltin narxining oshishi hisobiga bo`ldi, lekin zaxiralarimiz xavotirli darajada kamayib ketgani haqidagi gap-so`zlar asossiz. Markaziy bankning yoki Moliya vazirligining saytiga kirsangiz, bu ma`lumotlar hamma uchun ochiq turibdi”, dedi moliya vaziri.
Jamshid Qo`chqorovga ko`ra, jamoatchilikning o`zi mamlakat tashqi qarzi va oltin-valyuta zaxirasi bilan qiziqa boshlaganining o`zi yaxshi hodisa. Uning ta`kidlashicha, xalq mamlakatning siyosiy jarayonlariga aralashmasa, hech qanday islohot ham, taraqqiyot ham bo`lmaydi.
