Koronavirus infeksiyasi tarqalishining oldini olish borasida zarur choralar ko`rilmoqda. Jumladan, epidemiologik surishtiruv hamda kasallik tarqalib ketmasligi uchun barcha profilaktik chora-tadbirlar to`liq amalga oshirilmoqda.
– Hozirga qadar koronavirus infeksiyasi qayd etilgan 6 nafar bemor klinikamizda yotqizilgan. Ular Jahon sog`liqni saqlash tashkiloti tavsiyalariga ko`ra, belgilangan stantdartlar asosida davolanmoqda, – deydi Virusologiya ilmiy tekshirish instituti direktori Erkin Musaboev. – Bemorlar shifokorlar tomonidan kecha-yu kunduz tibbiy nazoratga olingan. Umumiy ahvoli doimiy kuzatuvga olingan. Ayni paytda bemorlarimizning ahvoli qoniqarli.
Shu o`rinda ta`kidlash kerakki, koronavirus infeksiyasi tarqalishining oldini olish va ushbu infeksiyaga chalingan bemorlarni davolash uchun barcha sharoit yaratilgan. Jumladan, tibbiyot muassasalari zarur dori-darmon vositalari hamda mutaxassislar bilan etarli darajada ta`minlangan. Shu bois aholidan vahimaga berilmasdan, shaxsiy gigiena qoidalariga qat`iy amal qilishlarini so`rab qolamiz, deyiladi SSV Matbuot xizmati xabrida.