“Mening yurtim” (My5) telekanali 2020 yil 20 aprel soat 22.00 dan boshlab, yangi serial namoyishini boshlamoqda.
Qozoq ijodkorlarining mahsuloti bo`lmish mazkur serialning asl nomi «Qara shanraq», ya`ni qozoq xalqining o`tovi tepasidagi mo`risimon tuynuk tushuniladi. Odatda, «shanraq» so`zi qozoq xalqida xonadon, oilani anglatadi.
«Xonadon» syujeti markazida uch aka-uka taqdidiri yotadi. Ular bir ota-ona farzandi, bir xonadonda ulg`aygan bo`lishiga qaramay, o`z hayot yo`lini izlab, uch tomonga ketishgan. To`ng`ich o`g`il — Alisher biznesmen, omadli top-menedjer bo`lib, karera pillapoyalaridan odimlab ketardi. Shaxsiy hayotida u bir daryoning ikki qirg`og`i orasida suzayotgan kemaga o`xshardi. U muhabbat va mehribonlik orasida qay tomonga o`tishni bilmay ikkilanardi. Bir tomonda sobiq rafiqasi, sevgan insoni, ikkinchi tomonda hamkasb ayol va uning qizalog`i turardi. Aslida, Alisher hamkasbining qiziga bog`lanib qolgan edi, ayolga nisbatan esa faqat hurmat hissini tuyardi. Lekin hamkasbi Karinaning bu boradagi fikrlari butkul boshqacha.
O`rtancha o`g`il — Daulet bo`ydoq, biroz qo`rs, g`ururli sobiq sportchi, endilikda boks bo`yicha murabbiy. Shu bilan bir qatorda bir dam olish maskanini ijaraga olib, sayyohlik biznesini ham yo`lga qo`yishga harakat qilyapti. Mana shu oromgohga tasodifan kelib qolgan qo`shiqchi qiz Linda uning hayotga bo`lgan nigohini o`zgartirib yuboradi. U bir erda turib qolmay, doim izlanish va oldinga intilish kerakligini tushunadi.
Kenja o`g`il — Madi esa ota-onasi bilan birga yashaydi, uylangan 2 farzandi bor. U fermer xo`jaligini boshqarib, otasining ishini davob ettiradi. Ammo uning hayot yo`lida uchragan turli odamlarning ta`siri ham bo`ladi. Masalan, harbiy xizmatni birga o`tagan do`sti Tal`at uni turli shubhali biznesga torta boshlaydi. Madi otasining nazoratitdan xalos bo`lishni istagani uchun ham turli takliflarga rozi bo`ladi. Shu orada do`stining qo`shnisi bo`lgan Nurgulga iliq tuyg`ular seza boshlaydi. Ammo serial davomida oilasi ustunroq ekanini anglab etadi.
Shuni aytib o`tish joizki, mazkur filmda ota-ona va farzandlar, va do`stu birodarlar orasidagi munosabat, oila qadri va urf-odatlar, insonlarning boylikka bo`lgan qiziqishi hamda adolat hissi bizning xalqimiz hayotiga juda yaqin. Bu serial ma`naviy jihatdan xalqimizga mos bo`lgani uchun voqealarning qizg`in rivoji manzur keladi, degan umiddamiz.
Serial bir oila hayoti, muammolari va o`zaro munosabatlari haqida bo`lsa-da, unda har bir odam o`zi yoki atrofidagilarini ko`rishi mumkin. Film namoyish etayotgan vaziyatlarhar bir odamni xulosa chiqarish, fikrlashga undaydi, yosh avlodga esa oila va qadriyatlarni ulug`lash, qadrlashni o`rgatadi.
