“Ҳамроҳ” — юраги бўшлар кўриши тавсия этилмайди!

Кеча пойтахтимизнинг Алишер Навоий номли киносаройида триллер, драма жанрида суратга олинган “Ҳамроҳ” фильмининг журналистлар учун ёпиқ тақдимоти бўлиб ўтди.

Постановкачи режиссёр ва сценарий муаллифи Акром Шоҳназаров омадли танланган актёрлар жамоаси ҳамда оригинал мавзу билан ўз мақсадига эришди деб тўла айта оламиз.

Фильмнинг трейлери тақдим этилганида унинг психологик драма эканлигини пайқаш мураккаб эмасли, бироқ барча фильмлар хам трейлери каби томошабинни қизиқтира олмагани сабабли, фильм томошасидан олдин шундай шубҳалар мавжуд эди. Бироқ шубҳаларимиз ортда қолиб, “Ҳамроҳ” томошабинга ҳақиқаттан ҳам руҳий таъсир ўтказа олди.

Инсон ва руҳ ўртасидаги сирли муносабатлар воқеасига асосланган фильм томошабинни воқеалар ичига тортиб олади.

Актриса Юлдуз Ражабова гавдалантирган руҳ билан мулоқотга киришган Адиз Ражабов образи томошабинга психологик таъсир ўтказиб, уни биргаликда ҳис этишни уддасидан чиққан. Фильмда актёр Адиз Ражабовни янгидан кашф қилиш мумкин. Унинг руҳий кечинмалари ҳеч бир томошабинни бефарқ қолдирмайди.

Бундан 7 йил аввал ота уйидан қочиб кетган қизининг ҳатто руҳидан ҳам норози ота образи актёр Карим Мирҳодиев ижросида аъло даражада кўрсатиб берилган. Қизига бўлган меҳр ва нафратни бошқа актёр Карим Мирҳодиевчалик гавдалантириб беролмасди.

Ота уйини тўйига бир неча кун қолганда тарк этган қизнинг ўлимига нима сабаб бўлди, нима учун севгиси учун барчасидан воз кечган қизнинг руҳи безовта, ким уни бу кўйга тушишига сабабчи бўлди, руҳ нима сабабдан Адиз Ражабовни таъқиб қилмоқда? Воқеалар ечимини айтишни жоиз топмадик. Барчасини ўзингиз кўриб, гувоҳи бўлишингиз мумкин.

Фильмнинг ҳар бир саҳнасини омадли чиқишида оператор Рустам Мелиев ва постановкачи рассом Алишер Тўлибоевларнинг ишини алоҳида эътироф этишни жоиз топдик.

Фильм Бухоро шаҳри, Жиззаҳ вилояти ҳамда Тошкент шаҳрида суратга олинган. Фильмни 90 кун давомида 45 кун ичида суратга олинган. Фильмга тайёргарлик ишлари 75 кун давом этган.

Хулоса қилиб айтганда, руҳ ва инсон ўртасидаги сирли муносабатларга асосланган фильм ҳақиқаттан ҳам “Йилнинг энг кутилган фильми” номига даъвогарлик қилиши ва томошабинларнинг севимли картиналари қаторидан ўрин олиши шубҳасиз.

Фильм тақдимотига тушган болаларни катталар анча вақтгача тинчлантиришига тўғри келгани ва фильмдаги даҳшатли саҳналар таъсирини инобатга олиб, уни болалар ва юраги бўшларга кўришни тавсия этмаган бўлардик.

Фильмдан сўнг она образини гавдалантирган актриса Лола Элтоевани таасуротлари билан ўртоқлашар экан, фильмдан жуда ҳам таъсирланганини айтиб ўтди.

Ўзбекистонда хизмат кўрсатган артист Лола Элтоева:

– Фильмни мен ҳам ҳозиргина томоша қилдим. Фильм шахсан ўзимга жуда қаттиқ таъсир қилди, ҳали анча вақтгача унинг таъсиридан чиқолмасам керак. Бундай жанрда Ўзбекистонда илк бор фильм суратга олинди десак муболаға бўлмайди. Киноижодкорлар олдиларига қўйган вазифани аъло даражада уддалади деб айта оламан.

Фильмнинг ёпиқ тақдимотида картина бош роль ижрочилари ижодий сафарда бўлганликлари боис иштирок этишмади.

“Ҳамроҳ”нинг катта премьераси санаси ҳозирча аниқ эмас. Бу ҳақда кейинроқ маълумот берамиз, бизни кузатиб боринг!