АҚШ президенти Дональд Трамп ва КХДР етакчиси Ким Чен Ин ўртасидаги шу йил май ойи охири — июнь ойи бошига мўлжалланаётган учрашув катта эҳтимол билан Мўғилистонда ўтказилиши мумкин.
Бу ҳақда “Известия” нашри Сеул ҳамда Москвадаги дипломатик манбаларига таяниб хабар берди.
Учрашув жойи Улан-Батор шаҳрида бўлиши имконияти катталиги айнан Мўғилистон ҳам АҚШ, ҳам Шимолий Корея билан тенг дўстона алоқалар олиб бориши билан изоҳланмоқда. Ўз навбатида, масаланинг яна бир техник сабаби бор. Экспертларнинг айтишича, Пхеньян авиапаркининг эскириб қолганлиги ушбу давлат раҳбарининг Швеция ёки Швейцарияга тўғридан-тўғри етиб боришига имкон бермайди.
Эслатиб ўтамиз, икки етакчи ўртасидаги тарихий музокараларга мезбон бўладиган манзил ҳақида тахминлар билдириш Дональд Трамп Ким Чен Ин билан учрашишга тайёр эканлигини маълум қилгандан сўнг бошланиб кетганди.
“Бугун бу жой айнан Мўғилистон бўлиши ҳақиқатга жуда яқин. Ким таклиф этган Пхеньянга Трамп ички сиёсат нуқтаи назаридан боришни хоҳламаса, Ким эса Сеулга бормайди”, — дейди Жанубий кореялик юқори мартабали дипломат.
Хабарингиз бор, Дональд Трамп яқинда Ким Чен Иннинг денуклеризация ҳақидаги сўнгги баёноти ортида белгиланган муҳокамаларда катта муваффақиятга эришилишидан умид қилаётганини таъкидлаб ўтганди.
Эслатиб ўтамиз, илгари Трамп ва Ким Чен Ин ўртасидаги учрашув Швеция, Швейцария ва Осиёдаги номи эълон қилинмаган учта давлатда ташкил этилиши мумкинлиги қайд этилганди. Мазкур рўйхатдан Пекин, Сеул, Пхеньян ва Корея ярим оролидаги чегара ҳудуди ҳисобланган Пханмунжом номлари чиқариб ташланди. АҚШ президентининг айтишича, айни пайтга келиб номзод мезбонлар сони 2-3 тагача қисқартирилган.
Аммо “Известия” нашрининг шу бўйича йўллаган мурожаатига Мўғилистон ташқи ишлар вазирлиги тезкор шарҳ тақдим эта олмади.
АҚШ ва КХДР билан тенг муносабатда бўлиб келаётган яна бир давлат саналган Сингапур ҳам номзод мезбонларнинг торайтирилган рўйхатига киритилган. Бунда нафақат логистика (Пхеньяндан бу ерга бемалол учиб келиш мумкин), балки сиёсий жиҳатдан ҳам нуқтаи-назарлар инобатга олинган. Яна бир муҳим жиҳати, Сингапур йирик ва кўп сонли халқаро учрашувларни ўтказишда катта тажриба ҳамда зарур инфратузилмаларга эга. Хусусан, 2015 йилда ХХР ва Тайвань етакчилари ўртасидаги тарихий музокаралар айнан шу давлатда ташкиллаштирилганди.
Бироқ Сингапур ҳам “Известия” газетаси мурожаатига аниқ жавоб бермай, балки ўз ташқи ишлар идораси раҳбари Вивиан Балакришнаннинг “Би-би-си” ахборот манбасида қилган чиқишини илова қилди. Ўшанда у бирор давлат юқори даражадаги учрашувни қабул қилиш бўйича Сингапурга ҳали мурожаат этмаганини айтганди ҳамда “мамлакат эса ўзини-ўзи мезбонлик майдони сифатида таклиф қилиб, паровоз олдига тушиб югуришни истамаган бўларди”, - дея таъкидлаб ўтганди.
