Xabaringiz bor, joriy yilning 21 yanvar kuni Rossiya Federasiyasi Tomsk viloyati, Asino tumanida bir qavatli yog`ochdan qurilgan 1/3-uyda yong`in sodir bo`lgan edi. Natijada, ushbu xonadonda istiqomat qilgan 12 nafar O`zbekiston fuqarolaridan 10 nafari voqea joyida halok bo`lgan edi.
Tegishli xizmatlar bilan hamkorlikda olib borilgan surishtiruv ishlari natijasida halok bo`lgan fuqarolarning shaxsiga aniqlik kiritilib, ularning 8 nafari Navoiy viloyati, Qiziltepa tumanidan, 1 nafari Samarqand viloyati Kattaqo`rg`on tumanida istiqomat qilgani aniqlangan edi.
Mutaxassislar tomonidan olib borilgan birlamchi tahlil natijalariga ko`ra, yong`in oqibatida halok bo`lgan o`n birinchi fuqaro Andijon viloyati Andijon tumanida istiqomat qilgan Mamadjonov Muzaffarjon Dilmurotovich bo`lgani ma`lum qilindi.
O`zbekiston Respublikasi Prezidenti Shavkat Mirziyoevning topshirig`iga asosan, yong`in sabablarini o`rganish, jabrlanganlar va halok bo`lgan fuqarolarning oila a`zolariga yordam ko`rsatish maqsadida Hukumat komissiyasi tuzildi.
Komissiyaga:
— halok bo`lgan fuqarolar va jabrlanganlarning yaqinlariga zarur tibbiy va psixologik yordam ko`rsatish;
— jabrlanganlar va halok bo`lgan O`zbekiston Respublikasi fuqarolarining jasadini Vatanga olib kelish bo`yicha tashkiliy choralarni ko`rish;
— Rossiya mutaxassislari bilan hamkorlikda yong`inni kelib chiqish sabablarini o`rganish;
— mahalliy hokimiyat va o`zini o`zi boshqarish organlari bilan birgalikda vafot etgan fuqarolarning shaxsiga aniqlik kiritish va ularning oila a`zolariga dafn marosimlarini o`tkazishda amaliy yordam ko`rsatish kabi bir qator vazifalar yuklatildi.
“Human.uz” axborot portali ijodiy xodimlari 23-24 yanvar kunlari yong`in natijasida halok bo`lganlarning oilalaridan xabar olish, holatni ba`tafsil o`rganish maqsadida Qiziltepa tumanida bo`lishdi.
— Tuman hokimi va tuman faollaridan bir guruhi vafot etganlarning xonadonlarida bo`lib, ularning oila a`zolariga chuqur hamdardlik bildirishdi, — deydi tuman hokimligi matbuot xizmati rahbari Alisher Umedov. — Shuningdek, halok bo`lganlarning oila a`zolariga malakali shifokorlar tomonidan tibbiy va ruhiy yordam ko`rsatish tashkil etildi. Vafot etganlarning oilalarining har biriga alohida e`tibor qaratilmoqda. Har bir oilaga 5 million so`mdan moddiy yordam, 2 qop un, 50 litr o`simlik yog`i, 25-30 kg go`sht mahsulotlari, dafn marosimlarini o`tkazish bilan bog`liq barcha tashkiliy masalalarga ko`mak ko`rsatilmoqda. Bundan tashqari “Mahalla” xayriya jamoat fondi tomonidan 15 million so`mdan moddiy yordam berildi. Ularga dalda bo`lib turish maqsadida faollar ularning yonida dalda bo`lib turishibdi.
Ijodiy jamoa haloq bo`lganlarning oilalarida bo`lib, ularga hamdardlik bildirib, qaytishdi.
FVV bergan ma`lumotga ko`ra, kecha 26 yanvar kuni vafot etganlar dafn etish uchun Rossiya Federasiyasidan yurtimizga olib kelindi. Shu kuni ular o`z ona eriga dafn etildi.
Videolavhani batafsil tomosha qiling:
Mavzuga oid:
Tomskdagi fojia yuzasidan jinoyat ishi qo`zg`atildi
Bugun Tomskda yong`in oqibatida halok bo`lgan vatandoshlarimizning jasadlari Toshkentga keltirildi
Tomskdagi yong`inda 10 nafar o`zbekistonlik halok bo`ldi
O`zbekiston Bosh konsulxonasi Tomskdagi vaziyatni nazoratga oldi
Ramzan Qodirov Shavkat Mirziyoevga hamdardlik bildirdi
Otabek Umarov Tomskda vafot etgan vatandoshlarimizning yaqinlariga sabr-bardosh tiladi
Tomskdagi yong`inda halok bo`lgan barcha 10 nafar O`zbekiston fuqarolarining shaxsi aniqlandi
Yana Rossiya, yana yong`in, yana o`zbeklar, yana qurbon...
Rossiyada yonib ketgan 11-o`zbekistonlikning ham shaxsi aniqlandi.
