Davlat soliq qo`mitasi mehnat migrantlari uchun soliq joriy qilinayotgani haqidagi xabarlarni rad etdi(video)

Ijtimoiy tarmoqlarda chet elda ishlovchi migrantlar soliqqa tortilishi haqida xabarlar tarqaldi. Davlat soliq qo`mitasi ushbu masala yuzasidan munosabat bildirdi.Bu haqda "Tez news" xabar berdi.

"Prezidentimizning PQ-4829-sonli qaroriga muvofiq 2021 yil 1 yanvardan boshlab xorijda mehnat faoliyatini amalga oshirayotganlar o`zini o`zi band qilgan shaxslarga tenglashtirilgani sababli, internet tarmoqlarida mehnat muhojirlari uchun soliq joriy etilayotganligi to`g`risida noto`g`ri ma`lumotlar tarqalmoqda.

Soliq kodeksining 369-moddasiga muvofiq o`zini o`zi band qilgan shaxslar jismoniy shaxslardan olinadigan daromad solig`idan ozod etiladi.

O`zini o`zi band qilgan shaxslar o`ziga pensiya hisoblanishi va ish stajiga ega bo`lishi uchun Pensiya jamg`armasiga ixtiyoriy ravishda ijtimoiy soliq to`lashi mumkin, bu 2020 yil uchun eng kamida BHMning 50 foizi miqdorida belgilangan, hozirgi vaqtda 111 500 so`mni tashkil etadi", — deyiladi Davlat soliq qo`mitasi bayonotida.

Shu bilan birga, agar chet elda vaqtinchalik mehnat faoliyatini amalga oshirayotgan fuqarolar O`zbekistonda pensiya va ish stajiga ehtiyoj sezmasa, Pensiya jamg`armasiga ijtimoiy soliq to`lashning hojati yo`qligi qayd etilgan.