Hozirgi kunda ko`pchilik asosiy vaqtini internet tarmog`idagi ko`ngilochar vositalar bilan o`tkazishni afzal biladi. Rost, dunyo yangiliklarini, turli telekanallar va radiostansiyalar dasturlari bilan “o`rgimchak to`ri” orqali tanishib borish mumkin. Va albatta turli messenjerlar sizga istagan kishingiz bilan elektron muloqot qilish imkonini beradi.
Deylik, bugungi radio haydovchilarning eng maqbul hamrohi bo`lsa, televidenie hali-hamon aholi o`rtasidagi eng ommabop axborot vositasi bo`lib qolayotir. Chunki, oila davrasida televizor ko`rib, chaqchaqlashib o`tirishga nima etsin? Shu bois, televizor tanlashda uning o`ziga xos jihatlarini hisobga olish talab etiladi.
Bugun texnika olami shiddat bilan rivojlanmoqda. Televizor ishlab chiqaruvchilar ham ana shu yangiliklarni e`tiborga olishadi, albatta... Deylik, yigirma yillar ilgari rangli televizorlar, masofadan boshqariladigan pultlar hashamdorlik belgisi sanalsa, bugungi kunda iste`mochilarning talablari ham, televizor imkoniyatlari ham sezilarli darajada ortgan.
Hajm ahamiyatga ega!
Xo`sh, yangi televizor xaridida nimalarga e`tibor qaratish lozim? Birinchi navbatda ekran diagonaliga e`tibor qarating. Agar xonangiz maydoni katta bo`lsa, TV hajmi ham shunga munosib bo`lishi kerak. Oshxona, yotoqxona yoki kichikroq xonalar uchun ixchamgina, deylik 32 dyuym (81 sm) diagonalga ega ekranli televizorlar kifoya qiladi.
Narxi 1 mln 200 ming so`mdan boshlanadi.
Zal yoki mehmonxonaga qo`yilidagin televizor ekrani diagonali 40 dyuymdan (101 sm) boshlanadi. Shunda siz ekranga uncha yaqin o`tirmasangiz ham bo`ladi. Bu ko`rish qobiliyatingizni turli xavf-xatardan asraydi. Shuningdek, bunday katta ekranli televizorlar tomoshabinlar sonining ham ko`proq bo`lishiga imkon beradi.
Oddiy, 40-42-dyuymli televizorlar narxi o`rnatilgan funksiyalariga qarab 2 mln so`mdan boshlanadi.
Ta`kidlash joizki, bugungi kunda, barcha zamonaviy televizorlarda fleshka, tashqi xotira tashuvchilar (qattiq disklar) o`rnatish va u orqali filmlar, fotosuratlar tomosha qilish va musiqa tinglash imkoniyatlari mavjud.
“AQL” qancha turadi?
Zamonaviy til bilan aytganda Smart-TV yoki “aqlli” televizorlar sizga biroz qimmatga tushishi mumkin. Ularda kompyuterga ulanmagan holda, internet tarmog`idan foydalanish imkoni mavjud. Veb-brauzer bilan ishlash jarayoni esa, masofadan boshqarish pulti yordamida bajariladi. Ayrim televizorlarda 3D funksiyasi mavjud. Bu esa, maxsus ko`zoynaklar yordamida tasvirlarni keng hajmda va aniq-tiniq ko`rish imkonini beradi.
Bunday televizorlarni 3 mln so`mdan boshlab sotib olish mumkin.
O`ta yuqori imkoniyatlarga ega panellar yanada qimmatroq turadi. Masalan, 40 dyuym (101 sm) diagonalli, 3840x2160 nuqtali (oddiy televizorlardan ikki baravar yuqori) “aqlli” televizorlar narxi 5 million so`mdan boshlanadi.
Agar sizga yanada kattaroq, aniq tasvirli televizor kerak bo`lsa, 50, 55 va hatto 65 dyuymli modellarga qiziqib ko`rishingiz mumkin.
Ularning narzxi 6 mln so`mdan boshlanib, 25 mln so`mgacha boradi. Ularning ko`pchiligi 3D funksiyasiga ega, yanada qimmatroq nusxalarda esa, qayrilma ekranlar mavjud bo`lib, tasvirni yanada aniq va yorqin ko`rish imkonini beradi.
Tasvirlar yorqinroq bo`lsa...
Televizor xarid qilayotganda, ishlab chiqarish jarayonida qo`llangan texnologiyaga e`tibor qarating. Bu erda tafovut faqat tasvirni individual qabul qilishda ko`zga tashlanadi. Hozirgi kunda suyuq kristalli, LED va plazmali panellar keng tarqalgan.
Hozirgi paytda suyuq kristalli panellarga talab ancha yuqori. Yorqin tasvirlarni esa, LED-ekranlar, suyuq kristalli panellar taqdim etadi. Ularda lampochkalar o`rnida svetodiodlar qo`llaniladi. Bu tasvirni imkon qadar mayin, sifatli qilib ko`rsatadi, narxi ham albatta, shunga yarasha bo`ladi.
… Yanada aniqroq
Eng kontarstlisi plazmali televizorlar sanaladi. Lekin ularda ekran har doim yorqin bo`lavermaydi. Faqat uyingizga alohida hashamat va salobat baxsh etishini aytmasa...
Ayni vaqtda, bunday televizorlar ko`zlarni quvnatadigan, ranglarga boy va yorqin tasvirlarni ko`rishga moslashgan. “Sharh burchaklari” ham ushbu TVlarning o`ziga xos jihatlaridan. Bunday televizorni yon tarafdan ko`rayotgan tomoshabinlar ham noqulaylik sezishmaydi. Biroq, suyuq kristalli ekranlar haqida bunday deyish qiyin. Bunday televizorlarni yon tarafdan ko`rilganda, ranglar aksi to`liq etib bormaydi.
Shu bilan birga har uchala turdagi televizorlar sifatli va chidamlilik jihatidan bir-biridan qolishmaydi.
Keyingi vaqtlarda ishlab chiqaruvchilar bunday ekranlarni mobil qurilmalardan “ko`chirilgan” IPS texnologiyalari bilan to`ldirishmoqda. Ular yordamida tasvir va ovoz sifati sezilarli darajada yaxshilanadi.
“Raqam”lar ortida...
Tanlov davomida e`tibor qaratish lozim bo`lgan yana bir muhim jihat bu katta hajmli raqamli televidenieni ko`rish kartasi ostida maxsus bo`lmalar borligidir. Quvonarlisi, mamlakatimizda raqamli televidenie imkoniyatlari kundan-kunga rivojlanib bormoqda. Bu har birimizga eshittirish va dasturlarni yuqori sifatda tomosha qilish imkonini beradi.
Darvoqe
Agar siz tasvirga uncha talabchan bo`lmasangiz, bu funksiyaning sizga keragi yo`q. Busiz televizor sizga biroz arzonroqqa tushadi.
Yaxshiroq eshitay desangiz...
Albatta, biz tomosha davomida lazzat olishni istaymiz. Shu bois tasvir hamisha tiniq, chiroyli ovozga jo`r bo`lishi kerak. Bu biror musiqali dastur, film tomosha qilishda katta ahmiyatga ega. Qoidaga ko`ra, ko`pgina televizorlarda 20 vatt quvvatga ega dinamika o`rnatilgan bo`ladi. Biroq, yanada kattaroq hajmli ovozlar uchun qo`shimcha akustik tizimlarni xarid qilishga to`g`ri keladi. Bu albatta uy kinoteatri jamlanmasi bo`lishi shart emas, masalan, kompyuterlarga mo`ljallangan karnayli ovoz kuchaytirgich bo`lishi ham mumkin.
Xulosa o`rnida
Smartfon, telefon, planshet, kompyuter yoki noutbuklarga nisbatan bugun televizorlardan sal kamroq foydalanmiz. Shu bois bu erda televizorning tavsifi va chastotasi emas, sizning didingiz va tanlovingiz muhim ahamiyatga ega.
