Farg`ona viloyatida gilos eksporti boshlandi. Bu haqda Bojxona qo`mitasi axborot xizmati xabar berdi.
Ma`lum qilinishicha, Farg`ona viloyatining Quva tumani va Quvasoy shaharlarida gilos pishgan. Gilosning erta pishar turlariga xorijiy davlatlarda ham talab kattaligi tufayli eksport qilish boshlangan.
Farg`ona viloyati bojxona boshqarmasining «Vodiy», «Marg`ilon» va «Quvasoy» tashqi iqtisodiy faoliyat bojxona postlarida allaqachon Rossiya, Qirg`iziston va Qozog`istonga chiqarilayotgan gilos eksport bojxona rejimiga rasmiylashtirilgan.
Ta`kidlanishicha, gilos juda nozik va tez buziluvchan meva hisoblanadi va uni yuqori haroratda hamda ko`p ushlab turish tovarning buzilishiga sabab bo`ladi. Shu sababli giloslarni tashish va yuklash ishlari, asosan, kechki vaqtlarda, ya`ni salqin ob-havoda tong otgunga qadar olib boriladi.
Farg`ona viloyati bojxona boshqarmasi tomonidan 2020 yilda qiymati 30 million dollariga teng 13 ming 360 tonna gilos eksport bojxona rejimiga rasmiylashtirilgan. Gilos, asosan, Rossiya, Xitoy, Koreya, Litva, BAA, Polsha, Ukraina, Belgiya, shuningdek, qo`shni Qirg`iziston va Qozog`istonga eksport qilingan.
