Bugun Samarqand Veterinariya medisinasi instituti yangi Bosh binosining tantanali ochilish marosimi bo`lib o`tdi. Marosimda O`zbekiston Respublikasi Veterinariya va chorvachilikni rivojlantirish Davlat qo`mitasi raisi Bahromjon Norqobilov, qo`mita tarkibidagi ilmiy tadqiqot va ilmiy tekshirish institutlari mutasaddi xodimlari, hududiy veterinariya boshqarmasi vakillari, shuningdek, institut professor o`qituvchilari va talaba - yoshlar ishtirok etishdi.
Mazkur bino qurilishi o`tgan asrning 85 yillarida ayrim sabablarga ko`ra, to`xtatib qo`yilgan, oradan o`tgan deyarli 35 yil mobaynida qurilishni davom ettirishga ko`p marta urinishlar bo`lgan, ammo bu ish amalga oshmagan. Mazkur mahobatli bino qayta qurilib, shu holatga keltirilguncha deyarli 2 yil vaqt ketdi va 28 mlrd. so`m davlat mablag`lari, qolaversa Veterinariya va chorvachilikni rivojlantirish Davlat qo`mitasi ko`magida qurib bitkazildi. Ahamiyatli jihati, binoda 9 ta eng zamonaviy rusumdagi ilmiy va o`quv laboratoriyalari mavjud. Bu laboratoriyalar salohiyati va nufuzi jihatidan dunyodagi eng ilg`or va etakchi oliy ta`lim muassasalari qoshidagi o`quv va ilmiy laboratoriyalar bilan raqobatlasha oladi. Jihozlar va asbob uskunalardan o`quv mashg`ulotlarida, qolaversa ilmiy tadqiqotlar maqsadlarida foydalanish mumkin. Evropa va Amerikaning eng so`nggi rusumdagi zamonaviy asbob - uskunalaridir. Veterinariya sohasida dunyoning eng ilg`or ta`lim standartlari, hayotda sinalgan nazariy va amaliy bilimlardan foydalanish juda muhimdir. Samarqand Veterinariya medisinasi instituti jamoasi ana shu maqsad yo`lida harakat qilmoqda.
Ochilish marosimidan so`ng mehmonlar institut Bosh binosi, laboratoriyalar, auditoriyalar va bu erda talaba - yoshlar, ilmiy izlanuvchilar va tadqiqotchilar uchun yaratilgan shart-sharoitlar bilan yaqindan tanishdilar.
anishuvdan so`ng, qo`mita raisi Samarqand Veterinariya medisinasi instituti talaba - yoshlari va professor - o`qituvchilar va mehmonlar uchun “Mustaqillik” darsini o`tdi.
Rais o`z so`zida ayni kunda mamlakatimizda veterinariya va chorvachilikni rivojlantirish sohasida amalga oshirilayotgan islohotlar va ularning bugungi natijasi, islohotlardan kutilayotgan maqsad, bajarilishi lozim bo`lgan muhim ishlar xususida ta`kidlab o`tdi. Jumladan, bugun yurtimiz aholisi 35 mln. nafarga etgan, mamlakat aholisini sifatli go`sht, sut va boshqa oziq-ovqat mahsulotlari bilan ta`minlash aynan mazkur soha vakillari sa`y harakatlariga bog`liqdir. Ma`lumotlarga ko`ra, mamlakat aholisining asosiy oziq-ovqat tovarlari, jumladan go`sht, sut va qishloq xo`jaligi mahsulotlariga bo`lgan ehtiyoji bundan 20 yillar oldin import hisobidan qoplangan bo`lsa, hozirda ularning 90 foizdan ortig`i mamlakatimizda ishlab chiqarilmoqda. Buning natijasi o`laroq, aholi jon boshiga go`sht iste`moli 1,4 barobar, sut va sut mahsulotlari –1,5 barobarga ko`paygan. Bu raqamlar mamlakatimizda oziq-ovqat xavfsizligini ta`minlash borasidagi ishlar salmog`ini ko`rsatadi.
Uchrashuv davomida qo`mita raisi, institut professor o`qituvchilari, talaba - yoshlar bilan samimiy muloqot qildi. Muloqotda muammoli masalani ko`tarib, unga chiroyli echim taklif qilgani uchun Samarqand Veterinariya medisinasi instituti talabasi, Beruniy davlat mukofoti stipendiati Ozodbek Sobirovga qo`mita raisi tomonidan noutbuk sovg`a qilindi. Shuningdek, rais o`z so`zida institut yangi Bosh binosi uchun qo`mita mablag`lari hisobidan 1 mlrd. so`m ajratilishini ma`lum qildi. Institutning ilg`or professor – o`qituvchilariga “Fahriy yorliqlar” topshirildi.
Samarqand Veterinariya medisinasi instituti rektori, professor Xudaynazar Yunusovning so`zlariga ko`ra, SamVMI mamlakatimizda veterinariya va chorvachilikni rivojlantirish sohasida etakchi oliy ta`lim muassasasi bo`lib qolaveradi va mamlakat iqtisodiyotida oliygoh tayyorlayotgan mutaxassislar va tadqiqotchilar tomonidan olib borilayotgan ilmiy izlanishlar muhim ahamiyat kasb etadi. Sohada ta`lim, fan, ishlab chiqarishning samarali integrasiyasida qo`lga kiritilgan natijalar esa, yurtimiz aholisining turmush farovonligini oshirishga xizmat qilishi, shubhasizdir.
