Shu kunlarda Qoraqalpog`iston Respublikasining Nukus shahrida bo`lib o`tayotgan II “Xalqaro baxshichilik san`ati festivali” doirasida konsert dasturlari, ilmiy-amaliy konferensiyalar bilan bir qatorda sayllar ham tashkil qilingan. Saviskiy muzeyi odidagi keng maydonda barcha viloyatlardan kelgan folklor jamoalari, san`atkorlar va DJ lar saylga kelgan yurtdoshlarimiz va chet ellik mehmonlarga turli xil chiqishlari bilan kayfiyat ulashishmoqda. “Darakchi” tahririyati bu festivalga kelolmagan, lekin qiziqayotganlar uchun ushbu fotoreportajni taqdim etadi.
Keng maydon barcha viloyatlarga bo`lib berilgan. Har bir pavilonda viloyatlar o`z hududi, tarixi va madaniyatini aks etgan maketlar, dekorasiya va sahna bezaklari bilan bezatilgan.
Nukusga “ko`chgan” Buxoro
E`tiborimizni tortgan pavilonlardan biri – bu Buxoro viloyati bo`ldi. Sababi, ko`hna Buxoroning barcha tarixiy ob`ektlari Nukusga “ko`chirib kelingan”.
Buxoro viloyati Madaniyat boshqarmasi direktori Shavkat Rahmonovning aytishicha, Buxoro pavilonidagi barcha bezaklar qo`l mehnati asosida yaratilgan va shu tomoni bilan ham bu maydon boshqa viloyatlarnikidan ajralib turibdi.
“Havoda muallaq turgan alloma”, “havoda o`tirgan Nasriddin Afandi” personajlari deyarli barchaning e`tiborini tortib, buning sirini har kim o`zicha talqin qilib, mehmonlarni o`ylantirishga ham undamoqda. Kreativ yondashuv!
Maydon markazida esa turli sahna ko`rinishlari va konsert dasturlarini o`tkazish uchun sahna, “Xon obrazi” va katta o`lchamda ishlangan o`zbek milliy cholg`u asboblari kombinasiyasini ko`rish mumkin.
“Tirilgan” Amir Temur
Qashqadaryo viloyati maydoniga o`tar ekansiz, Sohibqiron Amir Temur obrazini gavdalantirgan aktyorning qiyofasini ko`rib, hayratlanmasdan iloj yo`q - bizning ko`zimiz o`rgangan Amir Temur siymosiga shunchalik o`xshashki, qarshingizda haqiqiy Sohibqiron turgandek bo`ladi.
Shuningdek, bu maydonda boshqalardan farqli o`laroq, milliy qahramonlarimiz ijrosida qo`g`irchoq teatri ham qo`yilmoqda.
Somonsuvoqli ovul
Surxondaryo. Rang-barang boysuni do`ppilar savdosi avjida.
Somonsuvoqli uylar maketlari esa, huddi aslidek Surxon so`zanalari bilan bezatib qo`yilgan.
E`tiborlisi, Surxondaryo pavilonida Milodiy 1-2 asrlarga tegishli bo`lgan “Musiqachi ayollar” Ayritom frizining maketi ham joylashtirilgan.
Registon, nonlar, va albatta, Samarqand
Bu bezaklar Samarqand viloyati pavilonini bezab turibdi.
Umuman, maydonni aylanar ekansiz, har bir viloyatning o`ziga xos muhiti imkon qadar yaratilganining guvohi bo`lasiz. Qolgan ta`rif va taasurotlarning o`zingizga qoldiramiz.
Ayni paytda II “Xalqaro baxshichilik san`ati festivali” g`oliblarini taqdirlash marosimi bo`lib o`tishi kutilyapti. Bu haqda tez orada ma`lumot beramiz.
Sardorbek Rahmonqulov
