O`zbekiston Respublikasi aholisi va iqtisodiyot tarmoqlarini yoqilg`i-energetika resurslari bilan ta`minlash maqsadida neft va gaz geologiya-qidiruv ishlarining joriy holati va yil yakuni hamda 2022 yil uchun istiqbolli yo`nalishlarini aniqlashga qaratilgan ikki kunlik “Kuzgi muhokama” tadbiri boshlandi.
Ushbu tadbirda “O`zbekneftgaz” AJ Boshqaruvi raisining o`rinbosari Qobil To`xtaev, Davlat geologiya qo`mitasi Boshqaruvi raisining maslahatchisi Nuriddin Muxutdinov, “O`zbekgeofizika” AJ va IGIRNIGM DM rahbar va mutaxassislari, shuningdek, “O`zbekneftgaz” AJ neft va gaz qazib chiqarish boshqarmalarining bosh geologlari ishtirok etishmoqda.
Yig`ilishda dastlab 2021 yilning yanvar-oktyabr oylarida Davlat geologiya qo`mitasi tomonidan geologiya-qidiruv ishlarini tashkillashtirish, loyihalashtirish hamda istiqbollarni belgilash tadbirlarini muvofiqlashtirish borasida amalga oshirilayotgan ishlar bo`yicha axborot taqdim etildi.
Shuningdek, “O`zbekneftgaz” AJ tomonidan joriy yilning yanvar-oktyabr oylarida amalga oshirilgan geologiya-qidiruv ishlarining asosiy ko`rsatkichlari, 3D seysmik-qidiruv ishlarini bajarish holati, yangi maydonlarni burg`ilashga kiritish, izlov-qidiruv burg`ilash ishlarini bajarish, quduqlarni qurilish bilan tugatish bo`yicha bajarilgan ishlarning amaliy natijalari haqida hisobot berildi.
"O`zbekneftgaz" AJ Boshqaruvi raisi Mehriddin Abdullaev topshirig`iga asosan konlarda tabiiy gaz qazib chiqarishni ko`paytirish, uglevodorodlar zaxirasini oshirish maqsadida amalga oshirilgan keng ko`lamli ishlar natijasida joriy yilning o`tgan davri mobaynida belgilangan vazifalar ortig`i bilan bajarilganligi alohida qayd etildi.
Yig`ilish kun tartibiga ko`ra, “O`zbekneftgaz” AJ geologiya-qidiruv ishlaridan olingan yangi geologik-geofizik va burg`ilash ma`lumotlarini kompleks tahlil qilish asosida yil yakuniga qadar bajariladigan geologik tadbirlarning asosiy yo`nalishlari, shuningdek, uglevodorod zaxiralarini o`stirish bo`yicha qo`shimcha tadbirlarni o`tkazish masalalari ko`rib chiqildi.
Bundan tashqari, “O`zbekneftgaz” AJ tomonidan 2022 yilda Respublika uglevodorod xom ashyo bazasini rivojlantirish va qayta to`ldirishga maqsadida amalga oshirilishi mo`ljallanayotgan geologiya-qidiruv ishlarining asosiy parametrlari, maqsad va vazifalari, shuningdek, qo`shimcha yo`nalishlari bo`yicha ishlab chiqilgan dasturning asosiy parametrlari taqdim etildi.
Tadbirda shu bilan birga, “O`zbekgeofizika” AJ tomonidan neft va gazli hududlarda 2D va 3D seysmik-qidiruv ishlari, kon-geofizik tadqiqotlar, quduqlarni sinash, kern namunalarini tahlil qilish, zaxiralarni hisoblash borasida amalga oshirilayotgan ishlar borasida, shuningdek, IGIRNIGM DM tomonidan neft va gaz geologiya-qidiruv ishlariga doir ilmiy-tadqiqot ishlarini olib borish, izlov-qidiruv quduqlarini burg`ilash loyihalarini hamda smeta-hujjatlarini ishlab chiqish bo`yicha bajarilgan ishlar to`g`risida hisobotlar berib o`tildi.
Shuningdek, Ustyurt regioni bo`yicha joriy yilda amalga oshirilgan geologiya-qidiruv ishlarining natijalarini batafsil muhokama qilindi.
Tadbirning ikkinchi kunida Respublikaning Buxoro va Qashqadaryo viloyatlari, Hissor regioni hamda Farg`ona vodiysida amalga oshirilayotgan geologiya-qidiruv ishlarini to`liq muhokama qilinib, istiqbolli yo`nalishlarni, shuningdek 2022 yilda 20 ta yangi maydonlarni aniqlab olish rejalashtirilgan.
