Kecha, 22 noyabr kuni O`zbekiston savdo-sanoat palatasi va Hindiston savdo-sanoat palatalari federasiyasi bilan hamkorlikda onlayn shaklda O`zbekiston-Hindiston biznes-forumi o`tkazildi.
Tadbirda O`zbekiston savdo-sanoat palatasi raisi Adham Ikromov, Hindiston savdo-sanoat palatalari federasiyasi (FICCI) «Biznes va tadbirkorlik bo`yicha Hindiston-O`zbekiston forumi» hamraisi, FICCI xotin-qizlar tashkiloti vise-prezidenti Xarjinder Kor, O`zbekiston va Hindiston diplomatiya vakolatxonalari rahbarlari Dilshod Ahatov va Manish Prabhat, ikki mamlakat biznes doiralarining 50 dan ortiq vakili ishtirok etdi.
Adham Ikromov O`zbekiston va Hindiston o`rtasidagi savdo-iqtisodiy va ijtimoiy yo`nalishlardagi aloqalarning izchil rivojlanib borayotgani, so`nggi uch yilda mamlakatimizda hind kapitali ishtirokidagi kompaniyalar soni ikki barobar o`sgani buning yaqqol dalili ekanini ta`kidladi.
Xarjinder Kor Hindiston ishbilarmonlarining O`zbekiston bilan hamkorlik aloqalarini yanada chuqurlashtirishga qiziqishi tobora ortib borayotganini qayd etib, bu yo`nalishdagi hamkorlikni yanada rivojlantirishda ikki davlatni o`zaro bog`lovchi xalqaro transport yo`laklarini takomillashtirish hamda diversifikasiya qilish dolzarbligini aytib o`tdi.
Ishtirokchilarga mamlakatimizda so`nggi yillarda amalga oshirilgan keng ko`lamli iqtisodiy islohotlar, jumladan, biznes yuritishning afzalliklari, xorijiy investorlar uchun yaratilayotgan imkoniyatlar hamda qulay tadbirkorlik muhiti haqida batafsil ma`lumot berildi. Hind tadbirkorlari farmasevtika, sog`liqni saqlash, ta`lim, engil sanoat, ipakchilik, qishloq xo`jaligi, axborot-kommunikasiya texnologiyalari kabi istiqbolli yo`nalishlarda investisiyaviy imkoniyatlaridan keng foydalanishga taklif etildi.
O`zaro manfaatli hamkorlikni rivojlantirish masalalarini muhokama qilish, istiqbolli sarmoyaviy loyihalarni amalga oshirish masalalarini batafsil muhokama qilish maqsadida Hindiston savdo-sanoat palatalari federasiyasi tomonidan hind ishbilarmon doiralari vakillarining yaqin muddatda O`zbekistonga amaliy safarini tashkil etilishi ma`lum qilindi.
Tadbir yakunida ushbu shakldagi biznes-muloqotlarni o`tkazilishi ikki mamlakat ishbilarmon doiralari vakillari uchun qulay imkoniyat yaratib, kelgusida samarali natijalarga erishishda muhim omil bo`lishiga ishonch bildirildi.