“O`zbekneftgaz” aksiyadorlik jamiyatini transformasiya qilish dasturi doirasida burg`ulash jarayonlarini raqamlashtirish loyihasi ishga tushirildi. Bu haqda kompaniya Matbuot xizmati xabar bermoqda.
Burg`ilash jarayonlarini raqamlashtirish orqali qurilmalardan olinadigan ma`lumotlar shaffofligi ta`minlanadi, ularni to`plash optimallashtiriladi, muammolar joyida tezkor hal etiladi. Eng muhimi, bu jarayonlarda inson omili kamayib, mahsuldor qatlamni sifatli ochish, burg`ilash ishlarini betalofat olib borish va quduqning qurilish muddatini keskin qisqartirish imkoni yaratiladi.
“O`zbekneftgaz” AJ tomonidan quduqlarni burg`ilashni onlayn nazorat qilish maqsadida maxsus uskunalar xarid qilindi. Ayni paytda ularni burg`ilash dastgohlariga o`rnatish ishlari boshlab yuborilgan.
Ma`lum qilinishicha, mazkur uskunalar yordamida quduqlarni burg`ilash va murakkab qayta ta`mirlash ishlari jarayonida ma`lumotlarni uzatish tizimi raqamlashtiriladi va har bir texnologik jarayonning olib borish tartibi o`zlashtiriladi.
Qayd etish joizki, burg`ilash parametrlarini nazorat qilish tizimi va dasturiy ta`minotidan foydalangan holda quduqlardagi burg`ilash ishlari 24/7 rejimida onlayn tarzda nazorat qilinadi.
Kelgusida “O`zbekneftgaz” AJga qarashli barcha burg`ilash ob`ektlari bosqichma-bosqich “Burg`ilash ishlarini boshqarish markazi” tomonidan to`liq nazorat qilinishi ta`minlanadi.
Bugungi kunda burg`ilash parametrlarini nazorat qilish tizimi uskunalari va dasturiy ta`minot bo`yicha mutaxassislarni tayyorlash va malakasini oshirish ishlari amalga oshirilmoqda.
