Iqtisodiy hamkorlik tashkilotining sammiti doirasida O`zbekiston Respublikasi Prezidenti Shavkat Mirziyoev Tojikiston Respublikasi Prezidenti Emomali Rahmon bilan muzokara o`tkazdi. Bu haqda Prezident matbuot xizmati xabar bermoqda.
Davlat rahbarlari ikki mamlakat o`rtasidagi yaxshi qo`shnichilik, strategik sheriklik va ittifoqchilik munosabatlarini yanada mustahkamlash masalalarini muhokama qildilar.
O`zaro savdoni ko`paytirish, mashinasozlik, energetika, elektrotexnika, to`qimachilik va boshqa tarmoqlarda kooperasiya loyihalarini ilgari surish bo`yicha, shu jumladan Hukumatlararo komissiya faoliyati doirasida muvofiqlashgan ishlarni davom ettirish muhimligi qayd etildi.
Hududlar o`rtasidagi ishbilarmonlik aloqalari va madaniy-gumanitar almashinuvlarni kengaytirishga alohida e`tibor qaratildi.
O`zbekiston va Tojikiston etakchilari bo`lajak tadbirlar rejasini ham ko`rib chiqdilar.
Shuningdek, bugun, 9 noyabr kuni Prezident Shavkat Mirziyoev Iqtisodiy hamkorlik tashkiloti sammitida ishtirok etish uchun Toshkent shahriga kelgan Turkmaniston Prezidenti Serdar Berdimuhamedov bilan uchrashuv o`tkazdi.
Suhbat avvalida Turkmaniston Prezidenti Turkman xalqining milliy etakchisi, Turkmaniston Xalq Maslahati Raisi Gurbanguli Berdimuhamedovning salomi va eng ezgu tilaklarini etkazdi.
Ikki tomonlama munosabatlarning dolzarb masalalari hamda oliy darajadagi kelishuvlar ijrosi batafsil ko`rib chiqildi.
Tomonlar O`zbekiston bilan Turkmaniston o`rtasidagi ko`p qirrali hamkorlik va chuqurlashgan strategik sheriklik izchil rivojlanib, mustahkamlanib borayotganini mamnuniyat bilan qayd etdilar.
Savdo, sanoat, energetika, suv xo`jaligi, transport va boshqa ustuvor yo`nalishlarda amaliy hamkorlik kengaymoqda.
Hududlararo va madaniy-gumanitar aloqalar faol. Joriy yil oktyabr oyida Turkmaniston va O`zbekiston madaniyat kunlari muvaffaqiyatli o`tkazildi.
Ikki mamlakat Prezidentlari mintaqaviy kun tartibi va ko`p tomonlama tuzilmalar doirasidagi hamkorlik masalalarini ko`rib chiqdilar.
Shuningdek, Prezident Shavkat Mirziyoev IHT sammitining asosiy tadbirlarida ishtirok etish uchun mamlakatimizda bo`lib turgan Ozarbayjon Respublikasi Prezidenti Ilhom Aliev bilan muzokara o`tkazdi.
O`zbekiston-Ozarbayjon do`stlik va strategik sheriklik munosabatlarini yanada mustahkamlash masalalari ko`rib chiqildi.
Muntazam o`tkazib kelinayotgan oliy darajadagi muloqotlarda erishilgan kelishuvlarning natijalari katta mamnuniyat bilan qayd etildi.
Tovar ayirboshlash ko`rsatkichlari o`smoqda, avtomobil, elektrotexnika, to`qimachilik sanoatida, energetika tarmog`ida, qishloq xo`jaligi, logistika va boshqa ustuvor yo`nalishlarda muhim kooperasiya loyihalari amalga oshirilmoqda.
Madaniy-gumanitar tadbirlar o`tkazib kelinmoqda.
O`zbekiston va Ozarbayjon rahbarlari amaliy hamkorlik dastur va loyihalarini ilgari surish borasida birgalikdagi ishlarni jadal davom ettirish muhimligini ta`kidladilar.
