Londonda bo‘lib o‘tayotgan O‘zbekiston madaniy merosi haftaligi doirasida O‘zbekistondagi Islom sivilizatsiyasi markazi rahbari boshchiligidagi delegatsiya BBC axborot korporatsiyasida bo‘ldi.
Uchrashuvda teleradiokompaniyaning jahon xizmati ijrochi muharriri Mexfish Xusayn, tijoriy rivojlantirish bo‘limi mutasaddilari Fred Durman va Tamara Uollsh, BBC O‘zbek xizmati rahbari Xayrullo Fayz va boshqalar ishtirok etdi. Firdavs Abduxoliqov korporatsiya vakillariga O‘zbekistondagi Islom sivilizatsiyasi markazi faoliyati haqida ma’lumot berib, islom dinining insonparvarlik g‘oyalarini keng targ‘ib qilish, O‘zbekiston hududidan yetishib chiqqan buyuk allomalar faoliyati va ilmiy merosi haqida birgalikda qisqa videolavhalar, filmlar tayyorlash bo‘yicha hamkorlikni taklif qildi:
— Millionlab auditoriyaga ega bo‘lgan, dunyoning yetakchi axborot platformalaridan biri hisoblangan BBC bilan hamkorligimiz alohida e’tiborga loyiq, — dedi O‘zbekistondagi Islom sivilizatsiyasi markazi direktori. — Jumladan, bundan bir necha yil muqaddam BBC bilan hamkorlikda suratga olingan “Katta Langar Qur’oni: sirlar va haqiqatlar” hujjatli filmi nafaqat O‘zbekistonda, balki, dunyo miqyosida katta auditoriyaning e’tiborini qozondi. Kinematografiya agentligi bilan birgalikda yaratilgan “Usmon Qur’onining qaytishi” hujjatli filmi ham ana shu hamkorlikning o‘ziga xos mevasi bo‘ldi, deyish mumkin. O‘zbekistondagi Islom sivilizatsiyasi markazi tashabbusi bilan suratga olinishi mo‘ljallanayotgan, Qur’oni karimning O‘zbekistonga oid qadimiy qo‘lyozmalari haqidagi medialoyihamiz ana shu hamkorlikning mantiqiy davomi bo‘ladi, deya umid qilamiz.
Uchrashuvda bugun auditoriya, ayniqsa yosh avlod vakillari bilan ishlash, ularni qiziqtiradigan formatga mos kontent yaratish, turli zararli oqimlar va yot g‘oyalar ta’siridan himoyalash borasidagi hamkorlik yuzasidan fikr almashildi. Delegatsiya a’zolari BBC'ning O‘zbek xizmati faoliyati bilan yaqindan tanishdi.
