Amerikalik aktyor Tom Kruz "Uddalab bo‘lmas topshiriq" franshizasining so‘nggi filmida bajargan tryuki orqali Ginness rekordlar kitobiga kirdi. Bu haqda TASS xabar berdi.
"‘Uddalab bo‘lmas topshiriq – Final hisob-kitobi’ nomli franshizaning sakkizinchi, ya’ni hozircha so‘nggi qismi haqiqiy me’yorlarni oshirdi – Tomning filmdagi taassurotli tryuklari unga bir inson tomonidan amalga oshirilgan eng ko‘p yonuvchi parashyut bilan sakrashlar bo‘yicha Ginness rekordini ta’minladi", — deyiladi xabarda.
Aktyor sakrash sahnasi uchun 16 marta dubl qilgan. U vertolyotdan yonuvchi aralashmaga botirilgan parashyut bilan sakragan, parashyut havoda yona boshlagan, shundan so‘ng aktyor uni tashlab yuborib, zaxira parashyutni ochgan va omon-eson qo‘ngan.
"Hech bir boshqa aktyor yoki kaskadyor bunday ko‘p miqdorda xavfli sakrashlar qilmagan", — deyiladi rekordlar kitobida.
62 yoshli Tom Kruz o‘z filmlarini haqiqiyroq qilish uchun tryuklarni shaxsan o‘zi bajarishga intiluvchi aktyor sifatida mashhur. U buni asosan "Uddalab bo‘lmas topshiriq" filmida amalga oshiradi. Franshizaning eng so‘nggi qismi AQSHda may oyi oxirida prokatga chiqdi.
Kruz shuningdek Ginness rekordlar kitobida yana bir nomga ega — $100 milliondan ortiq daromad keltirgan eng uzoq davom etgan filmlar seriyasida ishtirok etgan aktyor sifatida.
