FIFA tashkilot va uning prezidenti Janni Infantino obro‘siga putur yetkazishga qaratilgan “tizimli va davomli harakatlar”ni keskin tanqid qildi.
Bu bayonot “Daily Telegraph” nashri Infantino UEFA bosh kotibi bo‘lgan davrdagi shaxsiy munosabatlari bilan bog‘liq holat yuzasidan xabar berganidan so‘ng yangradi. FIFA vakili Infantino ushbu ayblovlarni qat’iyan rad etganini va ularni asossiz deb hisoblashini bildirdi.
FIFA o‘z bayonotida “tasdiqlanmagan da’volar va ochiqdan-ochiq yolg‘on ma’lumotlar” tarqatilayotganini ta’kidlab, taxmin va ishoralarni fakt sifatida taqdim etmaslikka chaqirdi.
Infantino so‘nggi paytlarda FIFA Forward Enterprise loyihasi sababli Yevropa futbol tashkilotlari bilan munosabatlarda bosimga duch kelmoqda. Loyiha doirasida tijorat va chipta huquqlarini boshqarish uchun yangi kompaniya tuzish hamda uning 21 foiz ulushini xususiy investitsiya kompaniyasiga sotish rejalashtirilgan edi.
UEFA Infantinoga ishonch qolmaganini bildirgan. Norvegiya futbol federatsiyasi rahbari Lise Klaveness esa uni iste’foga chiqishga chaqirgan.
Shunga qaramay, FIFA Infantino tashkilotga a’zo 211 mamlakat federatsiyalari tomonidan demokratik yo‘l bilan saylanganini va o‘z vakolati asosida ishlashda davom etayotganini ta’kidladi. Infantinoni Afrika futbol konfederatsiyasiga a’zo 54 davlat ham bir ovozdan qo‘llab-quvvatlamoqda.
