Ayollar erkaklarga nisbatan makr ishlatishi mumkin, ammo ayollarni chuv tushirish oson emas. Balki shuning uchun «tulki» nisbati ayollarga ko`proq berilar. Xafa bo`lmang-u, «tovuqmiya» deb ham bekorga chiqarishmagan. Chunki ayollar tovuqqa o`xshab eri haqidagi hamma ma`lumotlarni «titkilab» topishga usta bo`ladi. Sizga taqdim etilayotgan quyidagi ma`lumotlar ham xuddi shu yo`l bilan topilgan…
Erlar o`rtasida o`tkazilgan so`rovnoma natijalari bilan tanishing. Erkaklarning:
- 62 foizi agar turmush o`rtog`ini chinakamiga sevsa, xiyonat qilmaslikka tayyor ekan.
- 71 foizi ayolining xiyonatini kechira olmasligini ta`kidlagan.
- 44 foizi bir ko`rishdayoq sevib qolganini bildirgan.
- 38 foizi sirlarini faqat eng ishongan do`stiga aytar ekan.
- 1 yilda jami 730 soat ayol bilan birga bo`lish haqida o`ylar ekan. Bu xayollari 60 yoshgacha 5 yilni tashkil etadi.
- 31 foizi mashinalar tirband bo`lgan paytda ayollarga gap otish bilan shug`ullanarkan.
- 73 foizi yuz terisini parvarishlovchi, 17 foizi esa ajinlarga qarshi ishlatiladigan kremlardan foydalanar ekan.
- 42,5 foizi haftada bir marta vaznini o`lchab turadi.
- 24 foizi qorindagi yog`larni yo`qotish uchun plastik operasiyaga ham tayyor.
- 53 foizi ovqatlanish tartibiga e`tibor beradi, ayniqsa, salat va dukkakli o`simliklarga ehtiyoji baland.
- Har to`rttadan uchtasi ko`chada sang`igandan ko`ra uyda romantik kecha o`tkazishni ma`qullagan.
- 95 foizi ayollarning silikon lablarini mutlaqo yoqtirmasligini aytgan.
- 89 foizi yaxshi raqs tusholmasligiga iqror bo`lgan. Ayollarning 7 foizigina buni tan olgan bo`lardi.
- Agar erkakning 6 soat bo`sh vaqti bo`lsa, yarmini televizor ko`rishga, 1 soatini xobbi va sportga, qolganini do`stlariga sarflar ekan.
- Ijodkor erkaklarning 46 foizi oq-sariqdan kelgan qizlarni xush ko`rarkan.
- 58 foizi oilani hayotda eng muhim deb hisoblarkan.
- Uchtadan ikkitasi har kuni ertalab vannada 20 daqiqa «pardoz-andoz» bilan shug`ullanadi.
- 65 foizi muammolarni mustaqil hal qilish kerak, deb o`ylarkan.
- 70 foiziga o`zining tashqi chiroyi nihoyatda muhim.
- 73 foizi uyda bola boqa olishini aytsa ham, atigi 5 foizigina buning uddasidan chiqadi.
Shuningdek, statistik ma`lumotlarga qaraganda, har bir erkak hayoti davomida o`rta hisobda 5 marta sevib qolarkan. Ayollar aynan beshinchisi bo`lishni istashi ajab emas.
Dilnoza UMAROVA
