O`zbekiston Respublikasi Qishloq xo`jaligi vazirligi o`z internet sahifasida videomrojaat e`lon qildi. Unda aytilishicha, yaqinda mamlakatimizda Qishloq xo`jaligi xodimlari kuni katta ko`tarinkilik bilan nishonlangan. Joylarda ushbu sana munosabati bilan Hosil bayramlari o`tkazilgan.
Vazirlik matbuot xizmatining ma`lumotlariga ko`ra, soha mehnatkashlarining sa`y-harakatlari natijasida joriy yilda 7 million 130 ming tonna g`alla, 2 million 845 ming tonna paxta, 19 ming 600 tonna pilla, 21 million tonna meva-sabzavot, 400 ming tonna sholi, 2 million 600 ming tonna go`sht va 11 million tonna sut mahsulotlari, 8,1 milliard dona tuxum etishtirildi.
Umuman olganda, joriy yilda qishloq xo`jaligi mahsulotlaridan jami 217 trillion 700 milliard so`m yoki o`tgan yilga nisbatan 12 foiz ko`p foyda olindi. 1,3 milliard AQSh dollari qiymatidagi 1,5 million tonna meva-sabzavot eksport qilindi.
Qishloq xo`jaligini isloh qilish, er-suv resurslaridan oqilona foydalanish, sohaga fan-texnikaning ilg`or yutuqlarini joriy etish, ekologik toza va eksportbop mahsulotlar etishtirishga qaratilgan chora-tadbirlar ham jadal davom ettirilmoqda.
Xususan, keyingi to`rt yilda hosildorligi past bo`lgan 300 ming gektar paxta va g`alla maydonlari o`rniga meva-sabzavot va ozuqa ekinlarini etishtirish yo`lga qo`yilib, jumladan, 32 ming gektar erda intensiv bog`lar, 15 ming gektarda tokzorlar, 2 ming gektarda zamonaviy issiqxonalar barpo etildi, 114 ming gektarda sabzavot va kartoshka, 72 ming gektarda dukkakli va moyli ekinlar, 52 ming gektarda ozuqa ekinlari etishtirilmoqda.
Mamlakatimiz qishloq xo`jaligi uchun mutlaqo yangi tizim bo`lgan klasterlarni keng joriy etishga ham alohida e`tibor qaratilyapti. Joriy yilda paxta hosilining 73 foizi paxta-to`qimachilik klasterlari tomonidan terib olingani bu tizimning qanchalik samarali ekanini amalda isbotlamoqda. Shu sababli, keyingi yildan boshlab paxta etishtirishni to`liq – 100 foiz klaster usuliga o`tkazishga qaror qilindi. Shuning barobarida, g`allachilik, meva-sabzavotchilik, parrandachilik, chorvachilik, baliqchilik va pillachilik klasterlarini tashkil qilish ishlari izchil davom ettirilmoqda.
“Qishloq xo`jaligi sohasida amalga oshirilayotgan tub islohotlar sohani iqtisodiyotimizning serdaromad tarmoqlaridan biriga aylantirishga, hayotimiz farovonligi, el-yurtimiz to`kinligiga xizmat qiladi” deyiladi ushbu videomurojaatda. Video:
