Bugun, 14 fevral kuni Milliy matbuot markazida O`zbekiston Respublikasi Tashqi ishlar vazirining birinchi o`rinbosari Ilhomjon Ne`matov ishtirokida matbuot anjumani bo`lib o`tdi. Bu haqda “Dunyo” AA muxbiri xabar qildi.
Anjuman O`zbekiston Respublikasi Tashqi ishlar vazirligining 2019 yil yakunlari va Prezidentimizning Oliy Majlisga Murojaatnomasidan kelib chiqqan holda belgilangan joriy yilgi ustuvor yo`nalishlarga bag`ishlangan bo`lib, unda 2019 yilda amalga oshirilgan oliy darajadagi tadbirlar va erishilgan natijalar haqida ma`lumot berildi.
Qayd etilishicha, o`tgan yilda 18 ta oliy darajadagi tashriflar amalga oshirilgan. Shundan 11 tasi davlat rahbarining chet ellarga, 7 tasi esa O`zbekistonga yuqori darajadagi tashriflardir. Ularda 122 ta turli sohalarda bitimlar imzolandi. 15 xalqaro biznes, investisiyaviy forumlar tashkil etildi.
Shuningdek, mamlakatimizda 4 ta nufuzli xalqaro tadbirlar o`tkazilgani aytildi.
Anjumanda Tashqi ishlar vazirining birinchi o`rinbosari Ilhom Ne`matov O`zbekiston siyosiy va iqtisodiy izolyasiyadan to`la xalos bo`lib, mamlakatimizdan Markaziy Osiyo mintaqasida integrasiya uchun to`siq, degan tamg`a olib tashlanganini ta`kidladi.