Prezident qaroriga muvofiq Denov tumani yangi, zamonaviy qiyofaga kiradi. Dastur asosida tuman markazidagi xiyobonda o`rnatilgan Amir Temur haykali qayta rekonstruksiya qilinadi.
Denov tumani hokimligi tuman markazidagi xiyobonda o`rnatilgan Amir Temur haykali xususida 2020 yilning 27 may kuni ijtimoiy tarmoqlarda e`lon qilingan materiallarni batafsil o`rganib quyidagilarni ma`lum qildi:
Tumandagi Amir Temur haykali Denov shahar hokimligining 1996 yil 25 apreldagi farmoyishiga asosan bunyod etilgan. Haykalda ulug` sarkardaning uch halqadan iborat belgi biriktirilgan hassani qo`lida tutgan siymosi aks etgan.
Uch halqa Temur va Temuriylar saltanati bayrog`i, tamg`asi va tangalarida tasvirlanganligi tarixiy manbalarda keltirib o`tilgan.
Qo`lida uch halqadan iborat belgi biriktirilgan hassa tutgan Amir Temur haykali bobokalonimizning shon-shuhrati, uch iqlimni birlashtirgan engilmas mashhuri zamon bo`lganligi ramzidir.
