Озарбайжон Мудофаа вазирлиги сайтида 12 сентябрга ўтар кечаси Арманистон қуролли кучлари бўлинмалари Озарбайжон-Арманистон давлат чегарасининг Дашкесан, Калбажар ва Лачин йўналишларида кенг кўламли провокацияни амалга оширгани ҳақида хабар берилди. Арманистон эса Озарбайжонни чегара ҳудудларини ўққа тутишда айблади. Боку Ереван провокациясига жавоб чораларини кўрганликларини билдирди. Ҳар икки томон қурбонлар ҳақида маълум қилди.
"Тунда Арманистон қуролли кучларининг диверсия гуруҳлари тоғли ҳудуд ва даралардан фойдаланган ҳолда Озарбайжон армияси бўлинмалари позициялари ва таъминот йўллари ўртасида турли йўналишларда миналаш ишларини олиб борди. Бўлинмаларимиз томонидан буларнинг олдини олиш бўйича кўрилган тезкор чора-тадбирлар натижасида тўқнашув юз берди”, дейилади хабарда.
Қайд этилишича, шахсий таркиб орасида йўқотишлар бўлган, ҳарбий инфратузилмага зарар етказилган. Арманистон Мудофаа вазирлиги ўз сайтида 13 сентябрь куни соат 00:05 атрофида Озарбайжон Қуролли кучлари бўлинмалари артиллерия, миномёт ва учувчисиз учоқлардан фойдаланган ҳолда кучли ўт очган. Арманистон-Озарбайжон чегарасининг бир нечта секторларида бир вақтнинг ўзида жойлашган арман позицияларида.
"Жумладан, Сотк, Варденис, Горис, Капан, Артаниш ва Ишхонасар йўналишида жойлашган позициялар ўққа тутилди. Фуқаролик инфратузилмаси объектлари ҳам ўқ остида. Арманистон Республикаси қуролли кучлари бўлинмалари жанговар вазифаларни тўлиқ бажармоқда", дейилади маълумотда.
Шунингдек, Арманистон томонида ўлганлар ва ярадорлар борлигини маълум қилди. Аввалроқ Арманистон ва Озарбайжон тинчлик битими устида ишлашни қайта бошлашга келишиб олган эди.
Шундан сўнг, Арманистон Бош вазири Никол Пашинян ва АҚШ Давлат котиби Энтони Блинкен жанговар ҳаракат бошланиши асносида Арманистон-Озарбайжон чегарасидаги вазиятни муҳокама қилди. Бу ҳақда Арманистон ҳукумати матбуот хизмати хабар берди.
“Бош вазир Озарбайжон томонидан Арманистон суверен ҳудудига нисбатан амалга оширилган ҳаракатга оид тафсилотни тақдим этди. Дўстлик шартномаси шартини бажариш учун Россияга расман мурожаат қилиш қарори тўғрисида маълум қилинди”, дейилади баёнотда.
Бунгача Пашинян телефон орқали Россия Президенти Владимир Путинни воқеа-ҳодисадан бохабар қилган. Шунингдек, Франция етакчиси Эммануэль Макрон билан ҳам чегарадаги вазиятни муҳокама қилган.
