​Умрини эзгуликка бағишлаган инсонлар

Аксарият одамлар оламда рўй бераётган ёвузликлар, шафқатсизликлар, атрофидаги инсонларнинг худбинликларидан чарчаган. Дунёда рўй бераётган турли портлашлар, ваҳшиёна жиноятлар ҳақидаги хабарларни эшитгандан кейин, бу ёруғ оламда бирорта ўзидан бошқани ҳам ўйлайдиган инсон қолганмикан, деган савол туғилади. Аслида эса, шундай инсонлар бор, уларнинг мавжудлиги туфайлигина ҳаёт давом этмоқда. Қуйида сизни шундай бағрикенг, кечиримли, умрини эзгуликка бағишлаган инсонлар билан таништирамиз.

Тереза онанинг амалга оширган ишлари

1999 йил, иккинчи минг йиллик остонасида, америкаликлар орасида ўтказилган сўровномага асосан Тереза она юз йилликнинг энг ҳурматга лойиқ инсони, деб топилди. Сўровномага жавоб берган америкаликлар

Мартин Лютер Кинг, Жон Кеннеди, Альберт Эйнштейн ва Хелен Келлердан кўра кўпроқ Тереза онанинг амалга оширган ишларига тан беришларини таъкидлашган.

Тереза онанинг шунчалик ҳурматга сазовор бўлишига нима сабаб бўлди?

Асл исм-шарифи Аньэз Гонж Бояжиу бўлган, “Раҳм-шафқат фариштаси” номи берилган Тереза она Рим католик черковининг роҳибаси ва миссонери эди. У бутун ҳаётини фақат одамларга ёрдам беришга бағишлади. Бугунги кунга келиб, одамлар уни пок ва олижаноб инсон сифатида хотирлашади.

1950 йилда Тереза она бемор, уй-жойсиз, ёрдамга муҳтож одамларга кўмак берувчи Раҳм-шафқат миссионерлик ташкилотига асос солади. 1979 йилда эса у Нобель мукофотига сазовор бўлади.

Тереза она 1997 йилда вафот этган.

Билл ва Мелинда Гейтслар жамғармасининг фаолияти

Билл ва Мелинда Гейтслар жамғармасининг фаолияти нафақат эзгуликнинг драматик кўриниши, балки ҳақиқий бағрикенг инсонликнинг яққол намунасидир. Билл Гейтс Уоррен Баффет билан ҳамкорликда яратган дастури доирасида омма олдида ҳаёти давомида ишлаб топган пулининг тенг ярмини хайр-эҳсон учун сарфлашга ваъда берди. 2011 йилда Билл ва Мелинда Гейтс жамғарма ҳисобига 28 миллиард доллар пул ўтказди.

Жамғарма бу пулларни очлик, қашшоқлик каби глобал муаммоларни ҳал этиш, соғликни сақлаш, турли вакциналар, тиббиёт ускуналари, дори-дармонлар сотиб олиш учун сарфлайди. Масалан, жамғарма туғма касалликларга чалинган болаларни қўллаб-қувватловчи “Болаларни қутқаринг” ташкилоти ҳисобига 112 миллион доллар, безгакка қарши янги вакцина ишлаб чиқариши учун MVI ташкилотига 456 миллион доллар маблағ ажратди.

Рим Папаси Иоанн Павел II уни ўлдирмоқчи бўлган қотилни кечирди

Туркиялик, исми-шарифи Меҳмет Али Агжа бўлган қотил 1981 йилнинг 13 май куни, Ватиканнинг Авлиё Пётр майдонида Рим Папасига қарата уч маротаба ўқ узди. Биринчи ўқ унинг кўрсаткич бармоғини узиб, қорнига, иккинчиси эса ўнг тирсагига тегди. Кейинчалик Папа ўзининг тирик қолганини “Яратганнинг инояти”, деб атади.

Орадан тўрт кун ўтиб, 1981 йилнинг 17 май куни Рим Папаси омма олдида ўзининг қотилини кечирганлигини, уни ўша куни, яъни “Тез ёрдам” машинасида касалхонага олиб кетилаётгандаёқ кечирганини маълум қилди. 1983 йилда эса, Папа 19 йиллик қамоқ жазосини ўтаётган Агжани кўриш учун қамоқхонага борди. Учрашувда Папа қотилининг қўлини ушлаб, уни кечирганлигини ўзига маълум қилди.

Нельсон Мандела инаугурациясига ўзи жазони ўтаган қамоқхона назоратчисини таклиф этди

Нельсон Мандела Жанубий Африкада ирқий айирмачиликка қарши ўтказилган намойишда қатнашганлиги учун 27 йилга озодликдан маҳрум этилади. У қамоқ жазосини Роббен оролида жойлашган қамоқхонада ўтайди.

1990 йилда озодликка чиққандан кейин ҳам унда ўзи жазони ўтаган қамоқхона назоратчиларидан қасд олиш нияти бўлмайди. Аксинча, оқ танли Христо Бренд исмли қамоқхона назоратчисини 1994 йилда ўзининг президентлик инаугурациясига таклиф қилади. Шундан кейин ҳам у Христо Брендни қамоқдан озод бўлганлигининг 20 йиллигига бағишлаб ўтказилган тадбирга чақиради. Христо Бренднинг айтишича, Нельсон Манделанинг бу ҳаракати унга қаттиқ таъсир қилиб, ҳаётини тубдан ўзгартирган. Унинг Нельсон Мандела билан бўлган дўстлиги олам аҳли учун “кечирим сабоғи” вазифасини ўтаган.

Иван Фернандес Анайя айтайлаб Абель Мутаига ютқазди

Кениялик, югуриш спорти билан шуғулланувчи Абель Мутаи 2012 йилда, Испанияда ўтказилаётган мусобақада етакчиликни қўлдан бермади. Маррага 10 метр қолганда, спортчи марра чизиғидан ўтдим, деб ҳисоблайди ва “ғалаба мен томонда”, деган қарорга келиб, секинлашади.

Иккинчи ўринга даъвогар бўлган, испаниялик спортчи Иван Фернандес Анайя олтин медални қўлга киритиш имконияти мавжуд бўлса-да, бунга ҳаракат қилмайди. У Абелга етиб олиб, уни марра чизиғидан биринчи бўлиб ўтишга ундайди. Кейинчалик Фернандес Анайя ўзининг биринчи ўринга лойиқ эмаслигини, ғалаба ҳаққоний бўлишини истаганлигини маълум қилди.

Байрам муносабати билан ярашган душманлар

1914 йилнинг декабрига келиб, Биринчи жаҳон уруши миллионлаб одамларнинг ёстиғини қуритишга улгурганди (мазкур урушда 14 миллион одам ҳалок бўлган). Рождество байрами куни немис ва британиялик аскарлар орасида ярашув куни, деб эълон қилинди. Шу куни ҳеч қандай отишув ва портлашлар бўлмади. Урушдан чарчаган, силласи қуриган аскарлар эса душман аскарлари билан бир-бирининг қўлини сиқиб, байрам билан табриклади. Ёнларида бўлган сигарета ва консерваларни бўлишиб, истеъмол қилишди. Немис аскарларининг окопидан эса, инглизча қўшиқлар янгради.

Эри ва фарзандларининг қотилини кечирган аёл

1994 йилда Марказий Африкадаги хуту ва тутси халқлари ўртасидаги этник уруш авжига чиқди. Айнан шу йили Ифигения Мукэнтэбана исмли аёлнинг эри ва беш фарзанди хутулар томонидан ўлдирилади. Бу фожианинг асосий сабабчиси эса Ифигениянинг қўшниси Жан Боско Бизиман исмли одам эди.

Орадан ўн йил ўтиб, “Руанданинг оламга йўли” лойиҳаси доирасида сават тўқиётган Ифигения Епифания Муканундви исмли аёл билан танишиб қолади. Кейинчалик бу аёл Жан Баско Бизиманнинг рафиқаси эканлигини билиб қолади.

Жан Босконинг ўзи эса, геноцид пайтида амалга оширган жинояти учун 7 йиллик қамоқ жазосини ўтаётган эди. Уни суд қилган Руанда судидан омма олдида кечирим сўраганда, Ифигения унинг кечирганлигини ва бу кечиримдан кейин яшашга куч топганлигини маълум қилади.

“Линус лойиҳаси”

“Линус лойиҳаси” – бу тижорат ташкилоти эмас. У касалхонадаги бемор болалар, меҳрибонлик уйлари, ижтимоий хизмат кўрсатиш ва хайрия ташкилотларини кўрпа-тўшак билан таъминловчи хайрия ташкилотдир. “Линус лойиҳаси”нинг мақсади оддий – у инсонлар ўзини бехавотир, қулай ҳис қилишини таъминлайди. АҚШнинг ҳар бир штатида “Линус лойиҳаси”нинг маҳаллий раҳбари ва “blanketeers” номли кўнгиллари мавжуд.

Масалан, Жоржия штатида 2010 йилда кўнгиллилар 1155 дона кўрпани қавиб, маҳаллий болаларга, 2012 йилда эса 147 дона кўрпани “Сэнди” довулидан жабр кўрганларга тарқатди.

Болаларга шафқатсиз муносабатда бўлувчиларга қарши курашадиган байкерлар

Болаларга шафқатсиз муносабатда бўлувчиларга қарши курашадиган байкерлар – бу яна бир нотижорат ташкилотдир. Улар 1995 йилдан бери болаларни зўравонликдан ҳимоя қилиб келади. Ташкилотнинг мақсади, болаларни жисмоний ва руҳий зўравонликдан асрашдир. Бундан ташқари, мазкур ташкилот терапия ва терапевтик ҳаракатларни молиялаштиради. Кўнгилли байкерлардан ташкил топган ташкилот болалар ўзини бехавотир ҳис қилишлари учун ҳаракат қилади. Байкерлар ҳуқуқ-тартибот идораси, энагалик қилиш агентлиги ходимлари ва бошқалар болаларга тайзиқ ўтказган вазиятларда, зўравонлик қилганда ёрдамга етиб келишади. Улар кўнгилли “дружинниклар” эмас, балки тансоқчилар вазифасини ўташади. Байкерлар болаларни мактабга, боғчага кузатиб қўяди ва уйларига соғ-омон етишларига ёрдам беради.

“Factroom.ru” нашри