Дунёдаги вазиятга мос равишда сўнгги кунларда юртимизда ҳам коронавирус пандемияси билан боғлиқ аҳвол мураккаблашмоқда. Айниқса, карантин чоралари муддатларининг узайиб бораётгани аҳоли, жумладан эҳтиёжманд оилаларни қийин аҳволга солиб қўйиши эҳтимолдан холи эмас.
Шу боис, бугунги кунда бундай оилаларни қўллаб – қувватлаш, уларнинг вакилларини ишга жойлаштириш, шу йўл билан уларда тирикчилик манбаи ҳосил бўлишига имконият яратиб бериш ишларини янада жадаллаштириш масаласи долзарблигича қолмоқда.
Бу борада прокурорлар секторлари масъулларига нисбатан талаб икки ҳисса кучайтирилиши алоҳида аҳамият касб этади.
Бугун Бош прокуратурада ҳудудий прокуратура органлари раҳбарлари иштирокида ўтказилган селектор йиғилиши Ўзбекистон Республикаси Президенти раҳбарлигида жорий йилнинг 8 июль куни ўтказилган йиғилишда белгиланган вазифаларнинг ижросини таъминлаш ҳамда эҳтиёжманд оилалар аъзоларининг бандлигини таъминлашни янада кучайтириш чораларини белгилаб олишга бағишланди.
Таъкидланишича, кўп бора танқид остига олинганига қарамасдан, эҳтиёжманд оилаларни қўллаб-қувватлаш борасидаги секторлар фаолиятида айрим жиддий камчилик ва нуқсонлар сақланиб қолмоқда.
Хусусан, айрим секторлар томонидан эҳтиёжманд оилалар аъзоларини барқарор ва истиқболли иш ўринларига жойлаштиришга етарли эътибор берилмаётгани кескин танқид остига олинди.
Шунингдек, айрим ҳудудларда иқтисодий комплекс йўналишидаги, яъни, оилавий тадбиркорлик, ҳунармандчилик ва жамоат ишларига ҳамда инвестиция, агросаноат, қурилиш лойиҳалари асосида иш ўринларига эҳтиёжманд оилалар аъзоларини жалб этиш, бўш турган давлат объектларидан фойдаланиш бўйича ишлар суст йўлга қўйилганлигига алоҳида тўхталиб ўтилди.
Аҳолини ҳунармандликка жалб этиш борасида Сурхондарё ҳамда такрорий экин экиш учун ер ажратиш борасида Андижон вилоятларининг ижобий тажрибалари алоҳида эътироф этилди.
Танқидий руҳда ўтган йиғилишда барча прокурорлардан секторлар ҳудудида эҳтиёжманд оилаларни қўллаб-қувватлаш ва бу фаолиятнинг устувор йўналишлари ҳақида аҳоли тўлиқ тасаввурга эга бўлиши мақсадида тарғибот-ташвиқот ишларини кучайтириш, жойлардаги секторлар штабларида “call-center” марказлари ташкил этган ҳолда маълумотлар киритиш жараёнини қатъий кунлик назоратга олиш талаб этилди.
Шу билан бирга, секторларда ишсизларни касбга ўргатиш, ёшларни “устоз-шогирд” тамойили асосида устозларга бириктириш масаласига жиддий эътибор қаратиш лозимлиги таъкидланиб, бу борада ҳар бир масъул прокурор ходимнинг шахсий жавобгарлиги масаласи белгиланди.
Йиғилишда секторлар раҳбарлари олдига эҳтиёжмандларни қўллаб-қувватлаш ҳамда уларнинг бандлигини таъминлаш борасида йўл қўйилаётган хато ва камчиликларни тезкор равишда бартараф этишга қаратилган аниқ вазифалар қўйилди.
Шунингдек, секторлар раҳбарлари ҳудудларда карантин қоидаларига қатъий риоя этилишини таъминлашга, инфекциянинг аҳоли орасида кенг тарқалишига йўл қўймасликка ҳам масъул эканлиги алоҳида қайд этилди.
