“Tabiiy gaz nazorati va hisobining avtomatlashtirilgan tizimini joriy etish” loyihasini amalga oshirishga doir qo`shimcha chora-tadbirlar to`g`risida Prezident qarori (PQ–4840-son, 24.09.2020 y.) qabul qilindi.
Qarorga muvofiq, “Tabiiy gaz nazorati va hisobining avtomatlashtirilgan tizimini joriy etish” loyihasi (Loyiha) doirasida:
tabiiy gaz nazorati va hisobining avtomatlashtirilgan tizimi (Tizim) “ishlab chiqarish – gaz taqsimlash stansiyasi – tuman (shahar) chegarasi – yirik uchastkalar kirish qismi – iste`molchi” prinsipida joriy qilinadi;
hisoblagichlar birinchi navbatda aholining tabiiy gaz iste`moli va qarzdorlik darajasi yuqori bo`lgan hududlarga o`rnatiladi.
Loyiha doirasida respublika bo`yicha jami 3 mln 546 ming 148 ta elektron gaz hisoblagich o`rnatilishi rejalashtirilgan.
Tizim:
2020 yil 1 oktyabrga qadar Qibray, Zangiota va Toshkent tumanlarida;
2021 yil 1 fevralga qadar O`rta Chirchiq, Chinoz, Yuqori Chirchiq, Yangiyo`l va Karmana tumanlari hamda Toshkent, Andijon, Buxoro, Guliston, Jizzax, Namangan, Nukus, Samarqand, Termiz, Urganch, Qarshi, Kattaqo`rg`on, Qo`qon, Marg`ilon shaharlarida va boshqa qarzdorlik darajasi baland bo`lgan hududlarda o`rnatiladi.
2021 yil 1 avgustga qadar respublikaning boshqa hududlarida iste`molchilarga zamonaviy hisoblagichlar o`rnatilib, Tizim to`liq joriy etiladi.
Loyihani moliyalashtirish va 2021 yil 1 avgustga qadar amalga oshirish uchun 150 million AQSh dollari miqdorida kredit jalb qilinadi.
Energetika vazirligi Loyiha o`z vaqtida amalga oshirilishiga mas`ul ijrochi organ hisoblanadi.
➡️ Qaror bilan Hisob palatasida Elektr energiyasi va tabiiy gazni hisobga olish va nazorat qilishning avtomatlashtirilgan tizimlarining joriy etilishini hamda hisob-kitoblar holatini monitoring qilish sho``basi tashkil etildi.
Hisob palatasiga quyidagi qo`shimcha vazifalar yuklatildi:
• ta`minotchi korxonalarning taqsimlash tarmoqlarida elektr energiyasi va tabiiy gaz yo`qotishlarining o`zgarishini tahlil qilish;
• elektr energiyasi va tabiiy gazni hisobga olish va nazorat qilishning avtomatlashtirilgan tizimlarini joriy etish holati, o`zaro hisob-kitoblar va mavjud debitor-kreditor qarzdorliklarining tahlili va monitoringini olib borish;
• maxsus hisob raqamlarga pul tushumlari, ularning maqsadli sarflanishi hamda kredit mablag`lari qaytarilishi ustidan tizimli nazorat o`rnatish.
2021 yil 1 iyunga qadar Tizim bilan muvofiqlikda ishlovchi zamonaviy billing tizimi yaratiladi.
