Эбола — кам учрайдиган, аммо жуда хавфли вирусли касаллик бўлиб, кўп ҳолатларда ўлимга олиб келади. У инсонга қон, қусуқ ва бошқа тана суюқликлари орқали юқади.
Мутахассислар маълумотига кўра, касаллик илк бор зарарланган ҳайвонлар, айниқса мевахўр кўршапалаклар орқали инсонга ўтади. Симптомлар 2 кундан 21 кунгача бўлган муддатда пайдо бўлиши мумкин.
Эболанинг дастлабки белгилари гриппга ўхшайди: иситма, бош оғриғи ва чарчоқ. Кейинчалик қусиш, ич кетиши, аъзолар фаолиятининг бузилиши ва баъзи ҳолатларда ички ёки ташқи қон кетиши кузатилади.
ЖССТ маълумотига кўра, Эболага қарши аниқ даво ҳозирча йўқ. Ўртача ўлим даражаси тахминан 50 фоизни ташкил этади. Айрим штаммлар учун вакцина мавжуд, аммо "Bundibugyo" турига қарши вакцина ҳали ишлаб чиқилмаган.
Сўнгги 50 йил ичида Африкада тахминан 15 минг киши Эбола қурбони бўлган. Конго Демократик Республикасидаги энг йирик эпидемия 2018–2020 йилларда кузатилиб, қарийб 2300 киши вафот этган.
