Bugun AOKA majlislar zalida shov-shuvlarga sabab bo`lgan “O`zbekistonda kuniga 5600 so`m ishlab topgan odam kambag`al emas” mavzusi doirasida tashkil etilgan matbuot anjumanida Iqtisodiy tadqiqotlar va islohotlar markazi direktori Obid Hakimov 3,2 AQSh dollari qanday qilib 5600 so`mga "tenglashtirilgani" haqida ham tushuntirish berdi.
“3,2 dollar qanday qilib 5600 so`mga o`tkazildi degan gapga keladigan bo`lsak, o`sha erda to`lov qobiliyati pariteti bo`yicha deb aniq qilib aytdik. To`lov qobiliyati pariteti bo`yicha 3,2 dollar qiymatdagi mahsulotlar, masalan AQShda bu qiymatga nima mahsulotlar sotib ololasiz, shu pulning qancha kuchi bor? Ushbu mahsulotlarni O`zbekistonda qanchaga olsa bo`ladi? Mana shu paritet koeffisienti bo`yicha hisoblanadi. U nominal bo`yicha hisoblanmaydi.Masalan, Amerikada bir dona nonni 2 dollarga oladigan bo`lsangiz, O`zbekistonda bir dona non 20 sent bo`ladi. O`n barobar farqi bor. Bu koeffisient bitta non, benzin yoki boshqa narsaga emas, bir nechta, mingdan ortiq mahsulotlar orqali hisoblab chiqiladi.
Bundan tashqari, 2020 yilda ham Jahon banki bilan birgalikda 2011 yildan beri to`lov qobiliyati pariteti bo`yicha bo`lgan summani hisoblab chiqqanimizda ham bu summa chiqqan. 5600 so`m deganim, bu summa ayrim koeffisientlar bo`yicha 6-6,5 ming atrofida turadi. Unchalik ham katta farq qilmaydi.
Kambag`allikni o`lchash deganda kambag`illikni tarifiga qarab o`lchovi ham o`zgaradi. Qanday tarif bo`lsa o`lchovi o`zgaradi. Aytaylik kambag`allik 5% bo`ladigan bo`lsa, boshqa tarifga nisbatan kambag`allik 10% bo`lishi mumkin. Bu qaysidir mamlakatning iqtisodiy holatidan, ijtimoiy-iqtisodiy odatidan kelib chiqib har xil o`lchovlar bo`ladi.
Bir narsani aytib o`tishim kerak: bu global kambag`allik ko`rsatkichi. Buni O`zbekistonda amal qiladi, deb hech kim aytgani yo`q, hech kim aytmaydi ham. Shuning uchun bizning asosiy maqsadimiz – O`zbekistondagi milliy kambag`allik chegarasini ishlab chiqish. Uni ishlab chiqish uchun hozir tadqiqotlar olib borilmoqda. Kecha aytilgan narsa O`zbekistonda shunday ekan, degan narsa emas. Bu kambag`allikni o`lchash bo`yicha o`lchov sifatida aytildi”, - deya Obid Hakimov keng muhokamalarga sabab bo`lgan fikrlariga izoh berdi.
