8 dekabr kuni Markaziy Osiyo mamlakatlari qishloq xo`jaligi vazirlarining ikkinchi yig`ilishi «Raqamli qishloq xo`jaligi: imkoniyatlar va muammolar» mavzusida o`tkazilib, videokonferensiya formatidagi uchrashuvda O`zbekiston Qishloq xo`jaligi vaziri Jamshid Xodjaev ishtirok etdi. Bu haqda vazirlik Matbuot xizmati xabar bermoqda.
BMTning Oziq-ovqat va qishloq xo`jaligi tashkiloti FAO tomonidan Qozog`iston Qishloq xo`jaligi vazirligi bilan hamkorligida tashkil etilga muloqotda BMT agentliklari va xalqaro moliya institutlarining mintaqaviy vakillari ham qatnashdi.
Tadbirning maqsadi Markaziy Osiyoda FAOga a`zo davlatlarda «raqamli qishloq xo`jaligi» atamasi, shuningdek, sohani yanada rivojlantirish uchun raqamli qishloq xo`jaligini rivojlantirish strategiyasini ishlab chiqish va amalga oshirish uchun talablarni umumiy tushunishga yordam berishdir. Yig`ilishda qisqa muddatda innovasion raqamli texnologiyalarni joriy etish mumkin bo`lgan potensial yo`nalishlar ham aniqlandi.
O`zbekiston qishloq xo`jaligi vaziri Jamshid Xo`jaev o`z nutqida O`zbekiston Prezidenti Shavkat Mirziyoevning tashabbusi bilan 2020 yil O`zbekistonda «Ilm, ma`rifat va raqamli iqtisodiyotni rivojlantirish yili» deb e`lon qilinganini ta`kidladi. Bu borada maxsus Davlat dasturi qabul qilingan. Shuningdek, «Raqamli O`zbekiston-2030» keng ko`lamli dasturi ishlab chiqilib, unda keyingi 10 yil davomida mamlakatni tubdan raqamli o`zgartirish ko`zda tutilgan.
Vazirning ta`kidlashicha, O`zbekiston Respublikasi Qishloq xo`jaligi vazirligi raqamlashtirishning umumiy darajasini ko`tarishga yordam beradigan uyg`unlashgan axborot tizimini yaratish ustida ish olib bormoqda. Shu bilan birga, Vazirlik qishloq xo`jaligi va oziq-ovqat ishlab chiqaruvchilarining o`z faoliyatida «aqlli» texnologiyalarni joriy etish borasidagi intilish va tashabbuslarini qo`llab-quvvatlashga alohida e`tibor qaratmoqda.
«Sohaning rasmiy regulyatori sifatida bizning vazifamiz biznes sub`ektlarini raqamli formatga muqarrar o`tish uchun tayyorlashdir. Eng muhim vazifalar qatorida agrologistik markazlar va qishloq xo`jaligi bilimlarini tarqatish bo`yicha mintaqaviy tarmoq yaratilishini qayd etishimiz lozim, ular axborot texnologiyalaridan foydalangan holda umumiy majmuaga birlashtiriladi», - deydi Jamshid Xodjaev.
Shuningdek, O`zbekiston qishloq xo`jaligi vaziri oziq-ovqat va qishloq xo`jaligi bo`yicha xalqaro raqamli Kengash tuzish konsepsiyasini ishlab chiqqani uchun butun FAO jamoasiga minnatdorlik bildirdi. Vazirning fikricha, maksimal ta`sir ko`rsatish uchun mazkur Kengash o`z ishini rivojlanayotgan mamlakatlar va kichik aylanma mablag`larga ega fermerlarga zamonaviy raqamli texnologiyalarni keng joriy etishga qaratishi lozim.
COVID-19 inqirozi shuni ko`rsatdiki, hukumatlar va xususiy sektor mavjud texnologiyalarni tez sur`atlarda kengaytirish va inqiroz sharoitida echim topish strategiyasi va mexanizmlarini amalga oshirish qobiliyatiga ega. Mobil pul, elektron to`lovlar, elektron tijorat va aktga asoslangan axborot va konsalting xizmatlari kabi raqamli echimlar agrar-oziq-ovqat tizimining kuchini oshirishi va fermerlarga muhim texnik xizmatlarni taqdim etishi mumkin.
Yaqinlashib kelayotgan 20 yil davomida qishlok xo`jaligi sohasiga barkaror asosda informasion texnologiyalar joriy etiladi. Raqamli texnologilar keng tadbiq etilgan qishlok xo`jaligi, nafaqat iqtisodiy tiklanish uchun balki, uning sifatini yaxshilash uchun, ayniqsa, kichik er egalari va fermerlar uchun xarakatlantiruvchi kuchga aylanishi mumkin. Bugungi uchrashuv Markaziy Osiyo davlatlari qishlok xo`jaligi raxbarlari ishtirokidagi ikkinchi tadbir bo`lib, FAO bu kabi tadbirlarning tashkilotchisi ekanligidan faxrlanadi. Biz ushbu uchrashuvni Markaziy Osiyo davlatlarida qishlok xo`jaligi sohasini jadal shakllantira oladigan muxim bir muloqot deb bilamiz", - deya o`z fikrini yakunladi FAO Bosh direktori o`rinbosari hamda Evropa va Markaziy Osiyo bo`yicha mintaqaviy vakili Vladimir Raxmanin.
Mamlakatlar o`rtasida ekspertlar darajasidagi muloqot qishloq xo`jaligi sohasini raqamlashtirish, qishloq xo`jaligida bir qator innovasion raqamli echimlarni aniqlash va uzoq muddatli loyihalar uchun asos yaratish bo`yicha tajriba almashish uchun katta qadam bo`ldi, deyiladi xabarda.
