Innovasion rivojlanish vazirligi tomonidan tashkil etilgan “TechnoWays” texnologik rivojlanish marafoni II mavsumi 2020 yilning 15 dekabr kuni yakuniga etdi. Bu haqda vazirlik Axborot xizmati xabar berdi.
Tadbirda marafon ishtirokchi bo`lgan yoshlar, ularni qo`llab-quvvatlagan yaqinlari, murabbiylari ishtirok etdilar. Marafon qatnashchilarini Innovasion rivojlanish vaziri birinchi o`rinbosari Shahlo Turdikulova, vazir o`rinbosari Olimjon To`yichev, Toshkent davlat iqtisodiyot universiteti rektori Qo`ng`irotboy Sharipov qutladilar. Tadbirda ishtirok etishga imkoni bo`lmaganlar uchun ZOOM va YouTube platformalari orqali marafonning final bosqichi taqdimotlari to`g`ridan-to`g`ri uzatildi.
Innovasion ishlanmalarni joriy etish ilmiy-amaliy markazi hamda Yoshlar akademiyasi hamkorligida o`tkazilgan ushbu marafon barcha iqtidorli yoshlarni o`z atrofiga yig`ishga va ular tomonidan joriy etilgan ixtirolarni qo`llab- quvvatlashga maqsad qildi. 25 kun davomida yoshlar 40 dan ortiq loyihalar bilan marafonda ishtirok etishdi. Yoshlar shu davrda vazirlik huzuridagi Innovasion ishlanmalarni joriy etish ilmiy-amaliy markazi hamda Yoshlar akademiyasi mutaxassislari yordamida o`z loyihalarini rivojlantirishdi, mualliflik ishlanmalarni amaliyotga tatbiq etish sirlarini o`rganishdi. Mavjud loyihani tayyor prototipini yaratish, mahsulotlarning bozorini topish va ularni tijoratlashtirish bo`yicha mahorat darslari o`tildi.
Final bosqichi marosimi davomida marafon qatnashchilari tomonidan loyihalar taqdimoti bo`lib o`tdi va eng yaxshi loyihalar e`lon qilindi Hay`at komissiyasi tomonidan eng yaxshi 10 ta loyihaning har biri 30 mln. so`mgacha bo`lgan mablag` bilan moliyalashtirilishi belgilandi. Bu marafonda ishtirok etgan boshqa loyihalar qo`llab-quvvatlanmaydi degani emas. Marafon ishtirokchilari o`z loyihalarini joriy etishga tayyor holatga olib kelganlaridan so`ng 30 mln. so`mgagacha mikromoliyalashtirish amalga oshirilishi ko`zda tutilgan.
“TechnoWays” texnologik rivojlanish marafonining 2-bosqichining natijalariga ko`ra moliyalashtiriladigan loyihalar:
1. Azizbek Xaitov – «Robototexnika asoslari» laboratoriyasi loyihasi. (Virtual reallik texnologiyasini qo`llagan holda ta`lim oluvchilarga turli murakkab va qimmatbaho qurilmalarning ko`rinishi, ishlash prinsipi haqida maksimal darajala bilim berish va ulardan foydalanish imkoniyatini yaratish).
2. Tog`aev Otamurod — «Transport vositalarini boshqaruv va kuzatuv tizimi» loyihasi. (Yuk mashinalarining marshruti, lokasiyasi, yoqilg`i sarfi, yuklarining butunligi nazorat qiluvchi maxsus ilova.)
3. Zayniddinov Bobur — «Suv osti roboti» loyihasi (Suv omborlari va kanallar tubini loyqalardan tozalovchi masofadan boshqariladigan suv osti robotini yaratish).
4. Begmatov Shohrux — «Ko`zi ojizlar uchun telefonga klaviatura» loyihasi. (Ko`rish qobiliyati cheklangan shaxslar uchun smartfondan foydalanish imkonini beruvchi maxsus klaviatura ishlab chiqish. Bunda an`anaviy Brayl alifbosidan foydalangan holda istalgan rusumdagi smartfonlarga USB interfeysi orqali ulanib, ulardan foydalanish imkoni bo`ladi.)
5. Bektashiv Islomjon — «Quvnoq oyoqchalar» loyihasi. (Qandli diabet bilan kasallangan bemorlarda kasallikning asorati sifatida yuzaga keltiruvchi«Diabetik to`piq» sindromini, ya`ni 80% holatda oyoq kesishga sabab bo`ladigan trofik yaralarning oldini oladigan oyoq kiyim ishlab chiqarish. Mazkur oyoq kiyim ichki yuzasidagi shariklar vibro massaj xamda oyoq kiyim ichki qismidan ajratiladigan issiqlik yordamida oyoqda qon aylanish yaxshilaydi. Narxi shu kabi mahsulotlardan 4 barobar arzon. «Dibetik to`piq» sindromining oldini olish.)
6. Dexqonov Oybek — Dastlabki tibbiy ma`lumotlarni avtomatlashtirish loyihasi. (Harbiy xizmatga nomzodlarni saralash jarayonida dastlabki tibbiy ma`lumotlar avtomatlashtirilgan tarzda o`lchab, olinadi va elektron ma`lumotlar bazasida saqlanadi.)
7. Madina Kahhorova — “Eyecaria” loyihasi. (Kichik bolalarda to`r pardasida hosil bo`ladigan saraton kasalligini aniqlash, ko`z kasalliklarini oldini olish, chekka hududlarda shifokorlar etishmasligi sharoitida ham diagnostika ishlarini olib borishga qaratilgan).
8. Dilshodov Asilbek — “MedClean”loyihasi. (Tibbiyot muassasalarida tibbiy chiqindilarni zararlantiruvchi idish)
9. Turdiev A., Jalilov S — “Smart drip irrigation system” loyihasi (Avtomatlashtirilgan texnik tizim erdagi namlikni doimiy kuzatib boradi. Agar erda namlik kamaysa uni sug`oradi, aksi bo`lsa avtomat tarzda o`chiradi.)
10. G`ulomov F. — «Eshitish qobiliyatida nuqsoni borlar uchun ovoz kuchaytirgich» loyihasi (Ovozni mikrofon yordamida qabul qilib tranzistorlar yordamida kuchaytirib foydalanuvchiga taqdim etuvchi uskuna)
