Инновацион ривожланиш вазирлиги томонидан ташкил этилган “TechnoWays” технологик ривожланиш марафони II мавсуми 2020 йилнинг 15 декабрь куни якунига етди. Бу ҳақда вазирлик Ахборот хизмати хабар берди.
Тадбирда марафон иштирокчи бўлган ёшлар, уларни қўллаб-қувватлаган яқинлари, мураббийлари иштирок этдилар. Марафон қатнашчиларини Инновацион ривожланиш вазири биринчи ўринбосари Шаҳло Турдикулова, вазир ўринбосари Олимжон Тўйичев, Тошкент давлат иқтисодиёт университети ректори Қўнғиротбой Шарипов қутладилар. Тадбирда иштирок этишга имкони бўлмаганлар учун ZOOM ва YouTube платформалари орқали марафоннинг финал босқичи тақдимотлари тўғридан-тўғри узатилди.
Инновацион ишланмаларни жорий этиш илмий-амалий маркази ҳамда Ёшлар академияси ҳамкорлигида ўтказилган ушбу марафон барча иқтидорли ёшларни ўз атрофига йиғишга ва улар томонидан жорий этилган ихтироларни қўллаб- қувватлашга мақсад қилди. 25 кун давомида ёшлар 40 дан ортиқ лойиҳалар билан марафонда иштирок этишди. Ёшлар шу даврда вазирлик ҳузуридаги Инновацион ишланмаларни жорий этиш илмий-амалий маркази ҳамда Ёшлар академияси мутахассислари ёрдамида ўз лойиҳаларини ривожлантиришди, муаллифлик ишланмаларни амалиётга татбиқ этиш сирларини ўрганишди. Мавжуд лойиҳани тайёр прототипини яратиш, маҳсулотларнинг бозорини топиш ва уларни тижоратлаштириш бўйича маҳорат дарслари ўтилди.
Финал босқичи маросими давомида марафон қатнашчилари томонидан лойиҳалар тақдимоти бўлиб ўтди ва энг яхши лойиҳалар эълон қилинди Ҳайъат комиссияси томонидан энг яхши 10 та лойиҳанинг ҳар бири 30 млн. сўмгача бўлган маблағ билан молиялаштирилиши белгиланди. Бу марафонда иштирок этган бошқа лойиҳалар қўллаб-қувватланмайди дегани эмас. Марафон иштирокчилари ўз лойиҳаларини жорий этишга тайёр ҳолатга олиб келганларидан сўнг 30 млн. сўмгагача микромолиялаштириш амалга оширилиши кўзда тутилган.
“TechnoWays” технологик ривожланиш марафонининг 2-босқичининг натижаларига кўра молиялаштириладиган лойиҳалар:
1. Азизбек Хаитов – «Робототехника асослари» лабораторияси лойиҳаси. (Виртуал реаллик технологиясини қўллаган ҳолда таълим олувчиларга турли мураккаб ва қимматбаҳо қурилмаларнинг кўриниши, ишлаш принципи ҳақида максимал даражала билим бериш ва улардан фойдаланиш имкониятини яратиш).
2. Тоғаев Отамурод — «Транспорт воситаларини бошқарув ва кузатув тизими» лойиҳаси. (Юк машиналарининг маршрути, локацияси, ёқилғи сарфи, юкларининг бутунлиги назорат қилувчи махсус илова.)
3. Зайниддинов Бобур — «Сув ости роботи» лойиҳаси (Сув омборлари ва каналлар тубини лойқалардан тозаловчи масофадан бошқариладиган сув ости роботини яратиш).
4. Бегматов Шоҳрух — «Кўзи ожизлар учун телефонга клавиатура» лойиҳаси. (Кўриш қобилияти чекланган шахслар учун смартфондан фойдаланиш имконини берувчи махсус клавиатура ишлаб чиқиш. Бунда анъанавий Брайл алифбосидан фойдаланган ҳолда исталган русумдаги смартфонларга USB интерфейси орқали уланиб, улардан фойдаланиш имкони бўлади.)
5. Бекташив Исломжон — «Қувноқ оёқчалар» лойиҳаси. (Қандли диабет билан касалланган беморларда касалликнинг асорати сифатида юзага келтирувчи«Диабетик тўпиқ» синдромини, яъни 80% ҳолатда оёқ кесишга сабаб бўладиган трофик яраларнинг олдини оладиган оёқ кийим ишлаб чиқариш. Мазкур оёқ кийим ички юзасидаги шариклар вибро массаж хамда оёқ кийим ички қисмидан ажратиладиган иссиқлик ёрдамида оёқда қон айланиш яхшилайди. Нархи шу каби маҳсулотлардан 4 баробар арзон. «Дибетик тўпиқ» синдромининг олдини олиш.)
6. Дехқонов Ойбек — Дастлабки тиббий маълумотларни автоматлаштириш лойиҳаси. (Ҳарбий хизматга номзодларни саралаш жараёнида дастлабки тиббий маълумотлар автоматлаштирилган тарзда ўлчаб, олинади ва электрон маълумотлар базасида сақланади.)
7. Мадина Каҳҳорова — “Eyecaria” лойиҳаси. (Кичик болаларда тўр пардасида ҳосил бўладиган саратон касаллигини аниқлаш, кўз касалликларини олдини олиш, чекка ҳудудларда шифокорлар етишмаслиги шароитида ҳам диагностика ишларини олиб боришга қаратилган).
8. Дилшодов Асилбек — “MedClean”лойиҳаси. (Тиббиёт муассасаларида тиббий чиқиндиларни зарарлантирувчи идиш)
9. Турдиев А., Жалилов С — “Smart drip irrigation system” лойиҳаси (Автоматлаштирилган техник тизим ердаги намликни доимий кузатиб боради. Агар ерда намлик камайса уни суғоради, акси бўлса автомат тарзда ўчиради.)
10. Ғуломов Ф. — «Эшитиш қобилиятида нуқсони борлар учун овоз кучайтиргич» лойиҳаси (Овозни микрофон ёрдамида қабул қилиб транзисторлар ёрдамида кучайтириб фойдаланувчига тақдим этувчи ускуна)
