“Zargarlik sanoatini yanada rivojlantirish uchun qulay shart-sharoitlar yaratish chora-tadbirlari to`g`risida”gi Prezident qarori (PQ–4998-son, 22.02.2021 y.) qabul qilindi. Bu haqda Adliya vazirligi xabar berdi.
Qarorga ko`ra, zargarlik buyumlarini ishlab chiqaruvchilarga kuyidagi shartlarda mikrokreditlar ajratiladi:
- 300 million so`mgacha bo`lgan miqdorda 3 yil muddatga, 6 oygacha imtiyozli davr bilan;
- Tadbirkorlik faoliyatini qo`llab-quvvatlash davlat jamg`armasining kafilligi va qonunchilik hujjatlarida nazarda tutilgan boshqa ta`minot turlari asosida.
Qaror bilan 2021–2023 yillarda zargarlik buyumlarini ishlab chiqarish, yosh mutaxassislarni tayyorlash va yaratiladigan yangi ish o`rinlarining maqsadli parametrlari tasdiqlandi.
Shunga ko`ra, belgilangan yillarda sohada jami 29 ming 500 ta yangi ish o`rinlari yaratilishi nazarda tutilgan.
2023 yil 1 yanvargacha zargarlik buyumlari ishlab chiqaruvchilarning xalqaro ko`rgazmalarda ishtirok etish bilan bog`liq xarajatlarining 50 foizi Tadbirkorlik faoliyatini qo`llab-quvvatlash davlat jamg`armasi tomonidan kompensasiya qilinadi.
