Toshkent shahri Olmazor tumanida 150 million so`mga noqonuniy dori sotayotgan erkak qo`lga olindi. Bu haqda Bosh prokuratura departamenti axborot xizmati xabar berdi.
Ma`lum qilinishicha, Bosh prokuratura huzuridagi Olmazor tuman bo`limi tomonidan Davlat xavfsizlik xizmati xodimlari bilan o`tkazilgan tezkor tadbirda, fuqaro U.B. dori vositalarini qimmat narxlarda dorixona va uning filiallaridan tashqarida muomalaga kiritgani aniqlangan. Shuningdek, u daromad orttirish uchun Hindistonda ishlab chiqarilgan jami 15 ming dona «Mesopril Kit» va «Avort-Kit» nomli dori vositalarini har bir donasini 10 ming so`mdan hisoblab, xaridorga 150 million so`mga sotishga kelishgan. Oldindan 5 ming donasini 50 million so`mga sotgan vaqtida ashyoviy dalillar bilan ushlangan.
Mazkur holat yuzasidan U.B.ga nisbatan Jinoyat kodeksining 186-3-moddasi (Dori vositalarini yoki tibbiy buyumlarni dorixona va ularning filiallaridan tashqarida realizasiya qilish) bilan jinoyat ishi qo`zg`atilib, tergov harakatlari o`tkazilmoqda.
