Ijtimoiy tarmoqlarda bir guruh o`zbekistonlik mehnat migrantlarining Tashqi mehnat migrasiyasi agentligining Andijon viloyati filiali orqali Rossiyaga ishlash uchun borgani, ammo va`da qilingan oylik maoshlari berilmayotgani haqida murojaati tarqaldi.
Rossiyadagi bir guruh O`zbekiston fuqarolarining yo`llagan murojaati yuzasidan Tashqi mehnat migrasiyasi agentligi axborot xizmati munosabat bildirdi.
Agentlik axborot xizmati ma`lum qilishicha , Cherkessk shahridagi “Yujny” agrokombinati korxonasida vaqtinchalik mehnat faoliyatini amalga oshirayotgan fuqarolar murojaatiga asosan ularning muammolarini o`rganish maqsadida joriy yilning 14-16 iyul kunlari Tashqi mehnat migrasiyasi agentligi ishchi guruhi ushbu korxonaga tashrif buyurgan.
Tashrif doirasida ijtimoiy tarmoqlar orqali murojaat qilgan fuqarolar bilan ham uchrashilgan.
O`rganishlar natijasida mazkur korxonada 2019 yildan buyon 46 nafar samarqandlik yurtdoshlarimiz mehnat faoliyatini amalga oshirayotgani, 2021 yilda yana 109 nafar andijonlik O`zbekistonlik fuqarolar ish boshlagani ma`lum bo`lgan.
Ish beruvchi korxona rahbariyati bilan mehnat migrantlarining yashash va mehnat sharoitlarini yaxshilash, oylik maoshlarini o`z vaqtida berish hamda hujjatlarni rasmiylashtirish jarayonlarini tezlashtirish bo`yicha kelishuv dalolatnomasi rasmiylashtirilgan.
Hozirgi vaqtda Tashqi mehnat migrasiyasi agentligi tomonidan yuqoridagi murojaat nazoratga olingan.
