O`zbekiston kinematografiya agentligi, Butunrossiya davlat kinematografiya instituti (VGIK)ning Toshkent filiali hamda “Hujjatli va xronikal filmlar studiyasi” DUK bilan hamkorlikda “Matonat maktabi” loyihasi bo`yicha filmlarni suratga olish ishlari davom etmoqda.
Bunda Tokio-2020 Paralimpiya o`yinlari g`olib va sovrindorlarining hayoti hamda sportdagi faoliyatiga doir 5 qismdan iborat hujjatli kinokartinalar yaratiladi. Loyiha doirasida “Mahoratli Husniddin”, “Elbekning g`ururi”, “Nafisaning faxri”, “Qat`iyatli Islom”, “O`rnak ko`rsatgan Shohsanam” kabi filmlar tayyorlanadi.
Kuni kecha “O`rnak ko`rsatgan Shohsanam” nomli hujjatli filmni suratga olish ishlari boshlab yuborildi. Unda mohir suzuvchimiz, Rio-2016 Paralimpiya o`yinlari (2 karra) hamda Tokio-2020 Paralimpiya o`yinlari bronza medali sohibasi Shohsanam Toshpo`latova haqida hikoya qilinadi.
Ssenariy mualliflari – Baxtiyor Karimov, Sabohat Jo`raeva, rejissyor – Baxtiyor Karimov, operator – Samijon Sunnatillaev, ovoz rejissyori – Shahzod To`xtamurodova, muharrir – Umida Yaxshiboeva, film direktori – Ozodbek Ergashev, badiiy rahbar Hamidulla Hasanov.
Shuningdek, O`zbekiston kinematografiya agentligi tomonidan parallel ravishda “Mahoratli Husniddin”, “Elbekning g`ururi”, “Nafisaning faxri” hamda “Qat`iyatli Islom” nomli hujjatli filmlarni tasvirga olish ishlari ham davom etmoqda.