O`zbekiston Respublikasi Bosh vazirining o`rinbosari - investisiyalar va tashqi savdo vaziri S.Umurzakov Bryussel shahrida Evropa Kengashi Prezidentining tashqi siyosat bo`yicha bosh maslahatchisi Saymon Mordyu bilan O`zbekiston va Evropa Ittifoqi o`rtasidagi siyosiy hamda iqtisodiy hamkorlikni chuqurlashtirish yo`llarini muhokama qildi.
Tomonlar ko`p qirrali sheriklikni yanada rivojlantirishga alohida ahamiyat qaratayotgani hamda ularni qiziqtirgan barcha sohalarda o`zaro hamkorlikni kengaytirish dinamikasini yuqori baholaganlar. Vazirlik buni qayd etmoqda.
Xususan, muloqotda bir qator qo`shma tadbirlar, ya`ni “EI – Markaziy Osiyo” sammiti, “EI – Markaziy Osiyo” o`zaro bog`liqlik bo`yicha Vazirlar uchrashuvi, “EI – Markaziy Osiyo” turizm forumini tashkil etish va o`tkazishga alohida to`xtalib o`tilgani aytiladi.
Shu nuqtai nazardan, O`zbekiston mintaqaviy o`zaro bog`liqlikni kuchaytirish, mintaqa mamlakatlarining barqaror iqtisodiy o`sishini ta`minlash va xavfsizlikni mustahkamlashga qaratilgan keng ko`lamli tashabbuslarni ilgari surish va amalga oshirish uchun barcha shart-sharoitlarga ega ekani ta`kidlab o`tilgan.
"Iqtisodiy sheriklikni chuqurlashtirish bo`yicha qo`shma chora-tadbirlar muhokama qilindi. Tomonlar investisiyaviy va savdo hamkorligini kengaytirish maqsadida yangi “o`sish nuqtalari”ni aniqlash uchun birgalikda harakat qilish zarurligini ta`kidladilar va bu borada keyingi qadamlarni belgilab oldilar",-deyiladi xabarda.
Xabar qilinishicha, O`zbekistonning Jahon savdo tashkilotiga a`zo bo`lishi to`g`risidagi tashabbusi doirasidagi hamkorlik masalalari ham muhokama qilingan. Evropa tomonining fikricha, bu tashabbus O`zbekistonning jahon iqtisodiyoti va ko`p tomonlama savdo tizimiga integrasiyalashuvi yo`lidagi muhim qadam bo`ladi.
Ma`lumot uchun, Jahon savdo tashkiloti (WTO, ingl. World Trade Organization) — mamlakatlararo savdo qoidalarini boshqarib turuvchi yagona xalqaro tashkilot hisoblanadi. Mazkur tashkilot xalqaro tijorat uchun qulay huquqiy tizimni taqdim eta oladigan cheksiz imkoniyat eshigi hisoblanadi.
Qayd etilishicha, uchrashuv yakunida ko`rib chiqilgan yo`nalishlar doirasida mavjud bo`lgan masalalarni hal qilishni tezlashtirish bo`yicha hamkorlikni faollashtirish to`g`risida kelishuvga erishilgan.
