Ўзбекистон Республикаси Бош вазирининг ўринбосари - инвестициялар ва ташқи савдо вазири С.Умурзаков Брюссель шаҳрида Европа Кенгаши Президентининг ташқи сиёсат бўйича бош маслаҳатчиси Саймон Мордю билан Ўзбекистон ва Европа Иттифоқи ўртасидаги сиёсий ҳамда иқтисодий ҳамкорликни чуқурлаштириш йўлларини муҳокама қилди.
Томонлар кўп қиррали шерикликни янада ривожлантиришга алоҳида аҳамият қаратаётгани ҳамда уларни қизиқтирган барча соҳаларда ўзаро ҳамкорликни кенгайтириш динамикасини юқори баҳолаганлар. Вазирлик буни қайд этмоқда.
Хусусан, мулоқотда бир қатор қўшма тадбирлар, яъни “ЕИ – Марказий Осиё” саммити, “ЕИ – Марказий Осиё” ўзаро боғлиқлик бўйича Вазирлар учрашуви, “ЕИ – Марказий Осиё” туризм форумини ташкил этиш ва ўтказишга алоҳида тўхталиб ўтилгани айтилади.
Шу нуқтаи назардан, Ўзбекистон минтақавий ўзаро боғлиқликни кучайтириш, минтақа мамлакатларининг барқарор иқтисодий ўсишини таъминлаш ва хавфсизликни мустаҳкамлашга қаратилган кенг кўламли ташаббусларни илгари суриш ва амалга ошириш учун барча шарт-шароитларга эга экани таъкидлаб ўтилган.
"Иқтисодий шерикликни чуқурлаштириш бўйича қўшма чора-тадбирлар муҳокама қилинди. Томонлар инвестициявий ва савдо ҳамкорлигини кенгайтириш мақсадида янги “ўсиш нуқталари”ни аниқлаш учун биргаликда ҳаракат қилиш зарурлигини таъкидладилар ва бу борада кейинги қадамларни белгилаб олдилар",-дейилади хабарда.
Хабар қилинишича, Ўзбекистоннинг Жаҳон савдо ташкилотига аъзо бўлиши тўғрисидаги ташаббуси доирасидаги ҳамкорлик масалалари ҳам муҳокама қилинган. Европа томонининг фикрича, бу ташаббус Ўзбекистоннинг жаҳон иқтисодиёти ва кўп томонлама савдо тизимига интеграциялашуви йўлидаги муҳим қадам бўлади.
Маълумот учун, Жаҳон савдо ташкилоти (WTO, ингл. World Trade Organization) — мамлакатлараро савдо қоидаларини бошқариб турувчи ягона халқаро ташкилот ҳисобланади. Мазкур ташкилот халқаро тижорат учун қулай ҳуқуқий тизимни тақдим эта оладиган чексиз имконият эшиги ҳисобланади.
Қайд этилишича, учрашув якунида кўриб чиқилган йўналишлар доирасида мавжуд бўлган масалаларни ҳал қилишни тезлаштириш бўйича ҳамкорликни фаоллаштириш тўғрисида келишувга эришилган.
