Unning birjada sotilishi fermer va dehqonlarga nima beradi?

Iqtisodiyot 07.06.2022, 21:33
Unning birjada sotilishi fermer va dehqonlarga nima beradi?

Jurnalistlar “O`zbekiston Respublika tovar-xom ashyo birjasi” aksiyadorlik jamiyatida un va g`alla mahsulotlarini ochiq birja savdolarida sotish sharoitlari bilan tanishishdi.

Hozirgi vaqtda O`zbekiston tovar-xomashyo birjasi Markaziy Osiyoda eng yirik, MDHda esa eng etakchi birjalar qatorida turadi. Zamonaviy axborot texnologiyalari birjaning faoliyat mohiyatini belgilaydi.  

Mutaxassislar ta`kidlashicha, birjada qatnashish uchun fermer va klasterlarda elektron imzo bo`lishi kifoya. Hozirda g`alla mahsulotini ochiq birjada sotish tumanlar miqyosiga tushirilishi ta`minlanmoqda. Xo`sh, fermer qanday qilib birja savdolarida ishtirok etadi?

Islombek IBRAGIMOV, bosh makler:

– Fermer Birjaga mahsulot qo`yish uchun avval Savdo sanoat palatasida tashkillashtirilgan savdo maydonchalari orqali birjaning veb saytida ro`yxatga o`tadi. So`ng, oldi-sotdi shartnomasi tuziladi. Boshlang`ich narx va etkazib berish shartlari ko`rsatiladi. Keyin avtomatik tarzda fermer uchun hisob varaq ochiladi. Fermerlar bu hisob raqamiga mablag` kiritadi va birjaga mahsulot qo`yadi. Savdolar auksion shaklda o`tkaziladi. Fermer o`zining brokeri yordamida jarayonlarda ishtirok etadi. Xaridor bitim summasining mablag`ini to`lagandan keyingina unga mahsulotni to`lik hajmda  yuklash amalga oshiriladi.  

G`allachilikda  bozor mexanizmlarini joriy etishda fermerlarga quyidagi imtiyozlar taqdim etiladi.

  • Fermerlar g`allani vaqtincha omborxonalarda saqlash uchun to`lovdan ozod etiladi.
  •  Birja o`quv kurslari o`tkaziladi.  
  •  Birjada mahsulotni sotishda fermerlar birja komission to`lovlari va garov mablag`larini kiritishdan ozod etiladi.  
  •  Barcha jarayonlarning shaffof bo`lishi va hisob-kitoblarni to`liq amalga oshirish birja tomonidan kafolatlanadi.
     

Mazkur vazifalarni ijro etish doirasida O`zbekiston Respublika tovar-xom ashyo birjasida zarur shart-sharoitlar yaratilgan.

Manzura BEKJONOVA

Sharhlar