Ijtimoiy tarmoqlarda Kitob tumanidagi viloyat 2-asab-ruhiy kasalliklar dispanserida ayrim bemorlar erda uxlashayotgani aks etgan video tarqaldi.
Mazkur murojaat yuzasidan Qashqadaryo viloyati sog`liqni saqlash boshqarmasi axborot xizmati ma`lumot taqdim etdi.
Aniqlanishicha, mazkur videotasvir 2022 yil 4 iyul kuni Kitob tumanidagi viloyat 2-asab-ruhiy kasalliklar dispanseri bolalar bo`limi navbatchi sanitarkasi Muqaddas Xujmatova tomonidan olinib, muassasa bosh shifokoriga telegram orqali taqdim etilgan.
2022 yil 5 iyul kuni dispanser jamoasining umumiy yig`ilishida mazkur holat muhokoma qilinib, bemorlarning o`z o`rniga yotishini ta`minlamasdan, nazoratsiz qoldirgan 4 nafar xodimga mehnat qonunchiligiga asosan intizomiy chora ko`rilgan. Yig`ilishda bunday holat boshqa takrorlanmasligi bo`yicha zarur choralar belgilangan.
Shuningdek, shu guruhda yuqoridagi foydalanuvchi tomonidan dispanserda qo`li shikastlangan bemor ayolga tibbiy yordam ko`rsatilmaganligi, u gipssiz yurganligi qayd etilgan.
Aniqlanishicha, 57 yoshli bemor ayol E.S. dispanserda “D” hisobda turadi. 2-guruh nogironi, 2022 yil 1 apreldan hozirgi kunga qadar bu muassasada yotib, davolanib kelmoqda. 2022 yil 3 iyun kuni yiqilib tushgan. Shu kuni chap qo`l kaft sohasi rentgen qilinib, travmatolog shifokorga ko`rsatilgan. "Chap qo`l 4-barmoq o`rta falangasining yopiq sinib siljishi" tashxisi qo`yilgan. Bemorga mutaxassis tomonidan tegishli muolajalar qilingan. 2022 yil 27 iyun kuni bemorning qo`li qayta rentgen qilinib, travmatolog shifokor nazoratidan o`tkazilgan. Suyaklari bitganligi sababli bog`lov echilgan. Hozirda bemorning ahvoli qoniqarli.
